Տարեվերջին Երևան-Բուխարեստ ուղիղ չվերթները կարող են շաբաթական մինչև 3-4 անգամ ավելանալ. դեսպան
Տարեվերջին Երևան-Բուխարեստ ուղիղ չվերթները կարող են շաբաթական մինչև 3-4 անգամ ավելանալ: «Հայաստան և Ռումինիա. հասարակություն, համագործակցություն և հեռանկարներ» թեմայով կլոր սեղանի ժամանակ այս մասին ասաց Ռումինիայում Հայաստանի Արտակարգ և լիազոր դեսպան Սերգեյ Մինասյանը:
Նրա խոսքով, սա վերջին երկու տարիների ընթացքում միջպետական հարաբերությունների, մասնավորապես, տնտեսական հարաբերությունների զարգացման արդյունք է: «Կարևոր դեր է խաղում նաև այն ծրագրերի իրականացումը, որոնք ոչ միայն պետական , մասնավորապես, խորհրդարանական, այլև փորձագիտական ուղղվածություն են ունենալու:
Հայաստանի և Ռումինիայի միջև շատ նմանություններ կան: Երկու երկրները հետկոմունիստական են, երկու երկրները եղել են Օսմանյան կայսրության կազմում:
Վերջին 30 տարիներին Հայաստանը և Ռումինիան հաջողություններ են արձանագրել քաղաքական վերափոխման մեջ: Սա խոսում է այն մասին, որ երկու երկրների համայանքների միջև կարող են քննարկման համար հետաքրքրիր թեմաներ լինել, մասնավորապես կոռուպցիայի դեմ պայքարի, խոսքի ազատության, քաղաքական մշակույթի, աշխարհաքաղաքականության և տարածաշրջանային անվտանգության ոլորտներում», - ասաց նա:
Դեսպանը հիշեցրեց, որ Ռումինիան առաջին երկրներից մեկն է, որ դիվանագիտական հարաբերություններ է հաստատել Հայաստանի հետ, առաջիններից է, որ վավերացրել է ԵՄ-ի հետ ընդլայնված գործընկերության մասին համաձայնագիրը, և Ռումինիայի հայ համայնքը մեծ դերակատարություն ունի այս բոլոր գործընթացներում:
Նշենք, որ ապրիլի 3-ին սկսվել են Երևան-Բուխարեստ ուղիղ չվերթները:
Ավելի վաղ Operativ լրատվականը հաղորդել էր, որ այսօր՝ հուլիսի 23-ին կայացել է Կլոր սեղան Երևանում՝ «Հայաստան և Ռումինիա. հասարակություն, համագործակցություն և հեռանկարներ» թեմայով: