Զորամասերի սննդի կազմակերպման պիլոտային ժամանակաշրջանը 3 տարի է, նպատակն է՝ բոլոր զորամասերում նույն ձևաչափով ապահովվի սննդի կազմակերպումը. Տոնոյան

ՀՀ պաշտպանության նախարարության զինված ուժերի 5 զորամասում օգոստոսից զինծառայողներին սնունդը կտրամադրվի նոր կարգով: Այս մասին հուլիսի 22-ին լրագրողների հետ զրույցում ասաց ՀՀ պաշտպանության նախարար Դավիթ Տոնոյանը:

«3 տարվա ընթացքում մենք պետք է հասնենք այն արդյունքին, որ բոլոր զորամասերում նույն ձևաչափով ապահովվի սննդի կազմակերպումը: Այս պահին չորս զորամասում է նոր կարգը գործում, նախապատրաստական աշխատանքներ են ընթանում 5-րդ զորամասի համար, որը բավական հեռավոր է, նաև ընդգրկված է մարտական հերթապահության մեջ: Մյուս ամսից այդ զորամասում ևս կգործի սննդի մատուցման նոր կարգը: Կամաց-կամաց է լինելու գործընթացը»,- ասաց Տոնոյանը:

Հարցին, թե որքանով է իրականությանը համապատասխանում տեղեկությունը՝, որ զորամասերում սննդի կազմակերպում իրականացնող կազմակերպության ղեկավարը իր մտերիմն է, Դավիթ Տոնոյանը չհերքեց. «Հաղթող է ճանաչվել 6 կազմակերպություն, որոնք հավասար պայմաններում իրականացնելու են այդ սննդի կազմակերպումը: Կան նաև «բողոքող» կազմակերպություններ, որոնք հաղթող կազմակերպություններին կապում են անձամբ ինձ հետ: Ես չեմ ժխտում, որ կազմակերպության ղեկավարն իմ խնդրանքով է դա կատարում հիմա, որովհետև ես ուրիշ վստահելի տարբերակ չունեմ: Դուք պատկերացնում եք, որ դա զինծառայողների սննդի հետ է կապված լինելու, և եթե ինքը չհաջողի, չեմ հաջողելու նաև ես: Որտե՞ղ խնդիր կա:

Կան սննդի կազմապերչական և վարչարարության խնդիրներ: Իրենք զբաղվում են վարչարարությամբ, նաև սննդի կազմակերպմամբ, զբաղվում են պրոֆեսիոնալները, որոնք այսօր Հայաստանում գոյություն չունեն: Նաև կան հրավիրված մասնագետներ: Մենք այդպիսի սննդի կազմակերպում զինծառայողներին չենք կազմակերպել, հիմա դա արվում է»:

Դավիթ Տոնոյանի խոսքով, այս պահին միայն այդ մեկ կազմակերպությունն է գործում. «Երբ մնացած 5 կազմակերպություններն անցնեն գործի, շատ արագ այդ զորամասերի թիվը կավելանա: Դուք կտեսնեք, որ մեկ ամսվա մեջ 3 զորամաս, 2 ամսվա մեջ՝ 4 զորամաս, այդպես քայլ առ քայլ կգնանք»:

Հարցին, թե վտանգավոր չէ՞ այդ կազմակերպություններին ռազմական տվյալներ փոխանցելը, նախարարը բացասական արձագանք տվեց. «Որովհետև ոչ մեկը ամբողջական պատկերը չունի: Իրենք ունեն ԱԱԾ հատուկ թույլտվություններ, նույն տեղեկությունները կարող են նույն հաջողությամբ այլ մարդիկ փոխանցեն»: