Սևանի ջրի մակարդակի իջեցման հարցում մեղավոր է ողջ հայ ժողովուրդը. փորձագետ
Սևանի ջրի մակարդակի իջեցման հարցում մեղավոր է ողջ ժողովուրդը։ Այս մասին լրագրողների հետ հանդիպման ժամանակ հուլիսի 16-ին ասել է «Հայաստանի սպառողների ասոցիացիա» ՀԿ նախագահ Արմեն Պողոսյանը։
Նրա խոսքով՝ սկզբում ջրի մակարդակն իջել է խորհրդային շրջանում՝ էներգետիկ կարիքների համար, իսկ հետագայում, արդեն անկախ Հայաստանում, նորից իջեցվել է մի քանի սանտիմետրով։ «Միևնույն ժամանակ, այն հասարակական կազմակերպությունները, որոնք պետք է ակտիվություն ցուցաբերեին և խոչընդոտեին աղետալի որոշումներին, պասիվություն ցուցաբերեցին։ Նման պասիվություն նկատվել է նաև այն ժամանակ, երբ ընդունվեցին որոշումներ «Նաիրիտի» և ԱԷԿ-ի վերաբերյալ։ Հայաստանի հարցերով զբաղվելու փոխարեն նրանք զբաղված են Փարիզի, Օսլոյի կամ էլի մի ուրիշ տեղի էկոլոգիական հարցերով»,- նշել է նա։
Պողոսյանը անհեթեթ է համարում Սևանի մասին առանձին օրենքի առկայությունը, քանի որ կա Ջրային օրենսգիրք, որը պետք է տարածվի բոլոր ջրային ռեսուրսների վրա։ Փորձագետի կարծիքով՝ պետք է այնպես անել, որպեսզի անպայման պահվի ջրի ծավալը 170 մլն խորանարդ մետր մակարդակին։
Նա միաժամանակ ավելացրել է, որ որոշ մարդիկ, որոնք այսօր ակտիվություն են ցուցաբերում Սևանի հարցի առնչությամբ, առհասարակ չպետք է խառնվեն։ «Անհասկանալի է, թե ինչու է խառնվում Սասուն Միքայելյանը։ Նա, ինչ է, Կոպեռնիկո՞սն է, թե՞ ամենագետ։ Այդ ամբողջ ակտիվությունը միայն իրեն ցուցադրելու նպատակ ունի»,- ամփոփել է Արմեն Պողոսյանը։
Հիշեցնենք, Operativ լրատվականը հուլիսի 15-ին տեղեկացրել էր, որ Սևանի լողափերի սեփականատերերը փակել էին Սևան-Երևան ավտոմայրուղին՝ բողոքելով այն տեղեկության դեմ, որ լճում վտանգավոր է լողալը, ինչի հետևանքով կրճատվել է հովեկների և զբոսաշրջիկների թիվը։
«Մեր երեխաներն են լողանում Սևանում, ինչո՞ւ չեն թունավորվում», հարցադրում էին անում ցուցարաները: