Քանի դեռ չեն իրականացվել հետազոտություններ, չի կարելի խոսել վթարի պատճառների մասին, այդ թվում՝ թե էլեկտրականության անջատումը պայմանավորված էր Իրանում վթարով. Սպարտակ Հակոբյան

Հստակ չափորոշիչների բացակայությունը թույլ չի տալիս գնահատել Հայաստանի էներգետիկ համակարգի վթարի հետևանքները։ Այս մասին լրագրողների հետ հանդիպմանն այսօր՝ հուլիսի 15-ին ասաց «Հայէներգոյի» նախկին տնօրեն Սպարտակ Հակոբյանը։

Նրա խոսքով՝ դա առաջ է բերում խնդիրներ նաև համակարգային մակարդակով խնդրի լուծման համար, որպեսզի երկիրը վնասազերծվի ապագայում լուրջ ցնցումներից։ Փորձագետն ավելացրել է, որ խնդիրն ընկած է նաև կառավարման հարթությունում, ինչպես նաև չկա ստեղծագործական մոտեցում։ «Պետք է մտածել ոչ թե պարզապես այն մասին, թե ում ձերբակալեն, ում ազատեն, այլ պետք է աշխատել արդյունավետության բարձրացման ուղղությամբ, այդ թվում ի հաշիվ էներգետիկ համակարգի աշխատակիցների որակավորման բարձրացման»,- նշել է նա։

Հակոբյանն ընդգծել է, որ քանի դեռ չեն իրականացվել հետազոտություններ, չի կարելի խոսել վթարի պատճառների մասին, այդ թվում և այն մասին, որ էլեկտրականության անջատումը պայմանավորված էր Իրանում վթարով։ «Եթե այդ վարկածը հաստատվի, ապա դա կվկայի այն մասին, որ մենք դասեր չենք քաղել 2013-ի վթարից, երբ ամբողջ երկիրը փաստացի մնաց առանց էլեկտրականության։ Սակայն քանի դեռ հետազոտություններ չեն կատարվել, որոնց արդյունքները հայտնի կլինեն վթարից 10 օր հետո, բոլոր խոսակցությունները, թե կա ինչ-որ հստակ պատճառ, բացարձակ դատարկ են»,- նշել է փորձագետը։

Սպարտակ Հակոբյանն ավելացրել է, որ ամբողջական պատկերն ստանալու համար պետք է անկախ տեխնիկական աուդիտ անցկացնել, ինչից հետո ներդնել հուսալի հակավթարային համակարգ՝ դրա համար փող չխնայելով։

Հիշեցնենք, հուլիսի 10-ին Operativ լրատվականը հաղորդել էր, որ ժամը 12.30-ից էլեկտրականության խափանումներ են հանրապետության տարածքում:

Այս առնչությամբ փոխվարչապետ Տիգրան Ավինյանը հայտնել էր. «Ունենք վթար էներգետիկ համակարգում։ Երևանի ՋԷԿ-ը և Հրազդանի 5-րդ բլոկը անջատված են։ Հանրապետությունով մեկ հնարավոր են անջատումներ։ Աշխատանքներ են տարվում, որպեսզի խնդիրը մինչև երեկոյան ժամը 7-ը կարգավորվի»:

ՀՀ Կրթության և գիտության նախարարն էլ իր Facebook-ի էջում հանդես էր եկել կոչով՝ «Մի քանի ժամ էլեկտրաէներգիա քիչ օգտագործենք»:

Խափանվել էր նաև Երևանի Մետրոպոլիտենի աշխատանքը:

Հուլիսի 12-ին լրագրողների հետ զրույցում նշեց Տարածքային կառավարման և ենթակառուցվածքների փոխնախարար Հակոբ Վարդանյանը՝ անդրադառնալով երկու օր առաջ էներգետիկ համակարգում տեղի ունեցած վթարին, ասել էր, թե՝ Այս պահին երկու վարկած կա. մեկն արտաքին, մյուսը՝ ներքին:

Վարկածներից մեկով հաճախականության հզոր տատանումը եկել է իրանական էներգոհամակարգում տեղի ունեցած վթարից:

Փոքր ՀԷԿ-երի նախագահն էլ էներգետիկ վթարի մասին արտահայտվել էր, թե՝ Հաքերային հարձակում հնարավոր չէ, ֆիզիկական վթար է եղել: