«Մեր երեխաներն են լողանում Սևանում, ինչո՞ւ չեն թունավորվում». Սևանալճի ջրի թունավոր լինելու շուրջ աղմուկը չի դադարում. Ցուցարարները մայրուղին են փակում
Իրավիճակը Սևանում շարունակում է լարված մնալ:
«Սևանի ջրի թունավոր լինելու մասին լուրերը տուրիստական ընկերությունների կողմից կազմակերպված շոու է»։ Այս մասին այսօր՝ հուլիսի 15-ին, Սևանի քաղաքապետարանի դիմաց բողոքի ակցիայի ժամանակ ասաց «Ընտանեկան լողափ» հանգստյան գոտու սեփականատեր Շահեն Ասատրյանը։
«Անցած տարվա հանգստացողների 2 տոկոսն է այս տարի Սևանում հանգստանում։ Անցած տարի ազատ տեղ չունեինք, այս տարի էլ մարդ չի գալիս»,– շեշտեց նա։
Շահեն Ասատրյանը նշում է՝ իրենց երեխաներն են լողանում Սևանում, ապա հարցնում՝ ինչո՞ւ չեն թունավորվում, եթե թունավոր է Սևանի ջուրը։
«Ափում ոչ միայն ջրիմուռ չկա, ոչ միայն ջուրը կեղտոտ չէ, այլ այս տարի ավելի մաքուր է»,–նշեց «Ընտանեկան լողափ» հանգստյան գոտու սեփականատերը։
Նա վստահ է՝ դիտավորություն կա այս ամենում. «Տուրիստական ընկերություններն ամեն ինչ անում են, որ մարդկանց տանեն Քոբուլետի»։
Ցուցարարները նաև վրդովված են՝ եթե Սևանի ջուրը թունավոր է, ինչո՞ւ են այդ ջրով Արարատյան դաշտավայրը ոռոգում։
Ցուցարարները հանդիպել են Սևանի քաղաքապետի և Գեղարքունիքի մարզպետւի հետ, ցուցարարների խոսքով՝ նրանք զանգում են առողջապահության նախարարին և շրջակա միջավայրի նախարարին, սակայն չգիտեն՝ կգան նախարարները և կհանդիպե՞ն արդյոք ցուցարարների հետ։
Ցուցարարները քաղաքապետարանի դիմաց ակցիա անելուց հետո հիմա ցույցը շարունակում են Երևան–Սևան մայրուղու «Գայի պոստ» կոչվող հատվածում և պահանջում են կառավարության ներկայացուցիչներից հայտարարել, որ Սևանի ջուրը թունավոր չէ և վտանգավոր չէ լողալու համար։ Մայրուղում մեծ թվով մեքենաներ և բեռնարատարներ են կանգնեցված։ Այստեղ որոշակի ոստիկանական ուժեր են կենտրոնացած։ Ցուցարարների և ոստիկանների միջև իրավիճակը մի պահ լարվեց, քաշքշոց սկսվեց ոստիկանների հետ, սակայն հետո հանդարտվեց։
Ցուցարարները տեսնելով, որ մեքենաներն, այնուամենայնիվ, կարողանում են շրջանցել իրենց մեքենաները, որոշեցին շարժվել դեպի Գագարին գյուղի մոտ գտնվող ճանապարհահատված, որտեղ մեքենաները չեն կարողանա շրջանցել և մայրուղին ամբողջությամբ կփակվի։
Հիշեցնենք, քիչ առաջ Operativ լրատվականը հաղորդել էր, որ Կեղծ տեղեկատվություն է տարածվում, թե Սևանի ջուրը մաքուր չէ, որի հետևանքով մարդիկ չեն գալիս հանգստանալու. Սևանի շրջակա տարածքների տերերը փակել են Սևան-Գավառ ճանապարհը