Երևանում համատարած խցանումներ են. լուսացույցները չեն աշխատում. ՃՈ պետը պարզաբանում է (լուսանկարներ)
Հանրապետությունում համատարած հոսանքազրկումների հետևանքով Երևանի փողոցներում անկառավարելի վիճակ է առաջացել։ Խաչմերուկներում չեն գործում լուսացույցները, համատարած խցանումներ են։ Մինչդեռ ճանապարհներին բացակայում են ոստիկանության կարգախմբերը, որոնք քիչ թե շատ կարող են կանոնակարգել երթևեկությունը։
News.am–ի հետ զրույցում Հայաստանի ճանապարհային ոստիկանության պետ Եգոր Կարապետյանը հայտնել է, որ լուսացույցների հետ կապված խնդիր է առաջացել ողջ Հանրապետությունում։
«Հոսանքն անընդհատ տատանվում էր, մինչև սերվերը պատրաստվում էր միանալ, նորից անջատվում էր»,–ասել է նա՝ նշելով, որ խնդիրն արդեն կարգավորվել է և համակարգը քիչ հետո կաշխատի։
ՃՈ պետը տեղեկացրել է, որ ոստիկանապետի հանձնարարությամբ Երեւան քաղաքում բոլոր կարգախմբերը մոտեցել են խաչմերուկներին. «Այն խաչմերուկներում, որտեղ լուսացույցները չեն աշխատում, մեր տեսուչները մոտենում և կարգավորում են երթևեկությունը»,–ասաց նա։
ՃՈ պետը նշեց, որ առայժմ չի կարող ասել, արդյոք հոսանքի տատանումների արդյունքում համակարգում տեխնիկա խափանվե՞լ է, թե՞ ոչ։
Եգոր Կարապետյանը չհիշեց, թե նախկինում Հանրապետությունում նման մասշտաբի հոսանքազրկումներ եղե՞լ են, թե ոչ, ինչի արդյունքում Երևան քաղաքում լուսացույցների համատարած խափանում լինի։
Ավելի վաղ Operativ լրատվականը հաղորդել էր, որ այսօր ժամը 12.30-ից էլեկտրականության խափանումներ են հանրապետության տարածքում:
Այս առնչությամբ փոխվարչապետ Տիգրան Ավինյանը հայտնել է. «Ունենք վթար էներգետիկ համակարգում։ Երևանի ՋԷԿ-ը և Հրազդանի 5-րդ բլոկը անջատված են։ Հանրապետությունով մեկ հնարավոր են անջատումներ։ Աշխատանքներ են տարվում, որպեսզի խնդիրը մինչև երեկոյան ժամը 7-ը կարգավորվի»:
Խափանվել էր նաև Երևանի Մետրոպոլիտենի աշխատանքը: