Պեկինում կառուցել են աշխարհում ամենամեծ օդանավակայանը

Պեկինում ավարտվել է աշխարհում ամենախոշոր «Դասին» միջազգային օդանավակայանի կառուցումը, հաղորդում է ՌԻԱ Նովոստի-ն՝ հղում կատարելով քաղաքի իշխանություններին:

Օդանավակայանի կառուցման նախագծի ղեկավար Լի Ցզյանհուան պատմել է, որ «Դասինը» ոչ միայն օդանավակայան է, այլ նաեւ Չինաստանում խոշորագույն տրանսպորտային հաբ է, որը կառուցելու համար ներդրվել է շուրջ 400 միլիոն յուան (գրեթե 60 միլիոն դոլար):

1 միլիոն քառակուսի մետր մակերեսով «ոսկե փյունիկի» տեսքով եւ մեկ տերմինալ ունեցող օդանավակայանի շահագործման մեկնարկը նախատեսվում է սեպտեմբերի 30-ին՝ ՉԺՀ-ի ստեղծման 70-ամյակի նախօրեին. նախագիծը գտնվում է նախագահ Սի Ցզինպինի անձնական հսկողության ներքո:

«Դասին» օդանավակայանը տեղակայված է Պեկինի հարավում՝ քաղաքից 46 կմ հեռավորության վրա: Այն կառուցելու հիմնական պատճառը «Շոուդու» օդանավակայանը բեռնաթափելու ձգտումն էր, որն աշխարհում ամենածանրաբեռնված օդանավակայաններից մեկն է: Երկու օդանավակայանների միջեւ հեռավորությունը շուրջ 67 կմ է: Օդանավակայանի կառուցման առաջին քարը տեղադրվել է 2014 թվականի դեկտեմբերի 26-ին, իսկ բուն շինարանությունը մեկնարկել է 2016 թվականի մարտի 16-ին:

Նոր օդանավակայանը կունենա 4 թռիչքուղի, տարեկան այն կկարողանա ընդունել մինչեւ 620 հազար չվերթ: Նախագիծը նախատեսում է, որ 2025 թվականին օդանավակայանի թողունակությունը կարող է կազմել 72 միլիոն մարդ: Դեռ ավելին, 2025 թվականին նոր օդանավակայանը պետք է սպասարկի տարեկան մինչեւ 2 միլիոն բեռ: