Մոսկվայում Միքայել Մելքումյանը բարձրացրել է ներկրվող ավտոմեքենաների մաքսատուքերի բարձրացումը հետաձգելու հարցը
ՌԴ մայրաքաղաք Մոսկվայում հունիսի 28-ին տեղի է ունեցել հայ-ռուսական միջպառլամենտական հանձնաժողովի 31-րդ համատեղ նիստը, որին մասնակցում էին նաեւ ՀՀ ԱԺ ԲՀԿ խմբակցության պատգամավորներ Վահե Էնֆիաջյանը, Միքայել Մելքումյանը, Նաիրա Զոհրաբյանը:
Նիստում քննարկվել են հայ-ռուսական միջպառլամենտական հարաբերությունների հետագա ընդլայնմանն առնչվող բազմաթիվ հարցեր, հնչել են տեսակետներ եւ առաջարկություններ:
Միքայել Մելքումյանի գրասենյակից հայտնում են, որ ի թիվս այլ հարցադրումների՝ ՀՀ ԱԺ Տարածաշրջանային եւ եվրասիական ինտեգրման հարցերի մշտական հանձնաժողովի նախագահ Միքայել Մելքումյանը, դիմելով նիստի մասնակիցներին եւ, մասնավորապես, նախագահող, ՌԴ Դաշնային խորհրդի փոխնախագահ Յուրի Վորոբյովին, նշել է, որ այս փուլում, երբ քննարկվում է նաեւ հայ-ռուսական հարաբերությունների հարցը ԵՏՄ շրջանակներում, ակնկալում է իր ռուս գործընկերների աջակցությունը հետեւյալ հարցերում.
. 2020թ. Հունվարի 1-ից ՀՀ համար երրորդ երկրներից ավտոմեքենաների ներկրման մաքսատուրքի արտոնյալ ժամկետի հնարավոր երկարացման հարցում կոնկրետ աջակցություն ԵՏՄ Բարձրագույն խորհրդում, քանի որ ՀՀ շուրջ 20 հազար քաղաքացիներ ըստ էության կմնան առանց աշխատանքի եւ եկամուտի, իսկ ՀՀ պետական բյուջեն կկորցնի շուրջ 100 մլն ԱՄՆ դոլար:
. ՀՀ եւ ՌԴ առեւտրաշրջանառությունը 2018 թ. մոտեցել է ընդհուպ 2 մլրդ ԱՄՆ դոլարին, սակայն ռեզերվներն ավելի քան մեծ են, եւ այստեղ հարցերից կարեւորագույնը Վերին Լարսում ճանապարհային խնդիրներն են, ուստի Մելքումյանն առաջարկում է, որպեսզի այստեղ գործի մշտական մոնիտորինգի համակարգ երկու երկրների կառավարությունների, իսկ անհրաժեշտության դեպքում՝ նաեւ երկու երկրների պառլամենտների միջեւ:
Նիստը նախագահող ՌԴ Դաշնային խորհրդի փոխնախագահ, հայ-ռուսական միջպառլամենտական հանձնաժողովի համանախագահ Յուրի Վորոբյովը նշել է, որ Միքայել Մելքումյանի առաջարկները կներառվեն միջպառլամենտական հանձնաժողովի նիստի արձանագրության մեջ, ուստի եւ կդառնան քննարկման առարկա: