Սոլակցի 15-ամյա պատանին նոր ռեկորդ սահմանեց եւ գրանցվեց «Դյուցազնագրքում»

Կոտայքի մարզի Սոլակ համայնքի 15-ամյա բնակիչ Հրայր Թովմասյանը նախօրեին ցատկապարանով ցատկելով նոր ռեկորդ սահմանեց՝ գերազանցելով իր նախորդ ցուցանիշը:

Սոլակ համայնքում միջոցառումը կազմակերպել էր Կոտայքի մարզի «Պատանի երկրապահ» ակումբների հրամանատար Նարեկ Սուքիասյանը, ով կարատեի մարզիչ լինելուն զուգահետ, բացահայտում է Հրազդանի տարածաշրջանի արտասովոր ունակություններով անձանց՝ նրանց ճանաչելի դարձնելու եւ «Դյուցազնագրքում» ռեկորդներ գրանցելու նպատակով:

Բացի սոլակցի պատանու գերազանցած ռեկորդից, մի քանի այլ ռեկորդներ էլ են գրանցվել, որոնք տեսնելու, գնահատելու եւ համապատասխանաբար գրանցելու համար Սոլակ էին եկել «Դյուցազնագիրք» դյուցազունների ասոցիացիայի նախագահ Վարդան Թովմասյանը, ասոցիացիայի կողմից կազմավորված հանձնաժողովի անդամներ: Միջոցառմանը ներկա էր նաեւ Սոլակ համայնքի ղեկավար Էդգար Խաչատրյանը:

«Տարիներ առաջ Հրայր Խաչատրյանը գրանցել էր առաջին ռեկորդը՝ 1 րոպե ժամանակահատվածում ցատկապարանով ցատկելով 263 անգամ, 2 տարի առաջ գերազանցել է առաջին ցուցանիշը՝ 30 րոպեում ցատկելով 5434 անգամ: Իսկ արդեն այսօր Հրայրը ցատկեց 1 ժամում 8320 անգամ՝ գերազանցելով նախորդ ցուցանիշները: Ասեմ նաեւ, որ ոչ միայն Հրայրի գրանցած ռեկորդը, այլ նաեւ մեր այսօրվա եւս երեք պատանիների գրանցած ռեկորդները առայժմ միակն են Հայաստանում: Դեռ ոչ ոք չի արել եւ սա շատ լավ առիթ էր, գուցե նոր մարդիկ լինեն, որոնք մրցակցության մեջ կմտնենն երեխաների հետ»,-նշեց Նարեկ Սուքիասյանը:

Բացի Հրայրի գերազանցած ռեկորդից, Սոլակ համայնքում կազմակերպված ցուցադրության ընթացքում 3 այլ ռեկորդներ գրանցվեցին, մասնավորապես, սոլակցի 8 ամյա Բորիս Չաթոյանը ցատկապարանով 1 րոպեում կատարել էր 234 ցատկ, հրազդանցի Սվետլանա Բրսոյանը, ով նաեւ «Պատանի Երկրապահ ակումբի» սան է, կալաշնիկով ինքնաձիգը քանդել-հավաքել է 16,68 վայրկյան ժամանակահատվածում, իսկ հրազդանցի Անդրանիկ Ալեքսանյանը՝ 15,40 վայրկյան ժամանակահատվածում:

Հիշեցնենք, որ հրազդանցի զոհված զինծառայող, Գինեսի ռեկորդակիր Արտակ Ռաֆայելյանն այն առաջիններից էր, ով Հրազդանի տարածաշրջանում ռեկորդ սահմանեց ու գրանցվեց «Դյուցազնագրքում»: Ուստի նրա զոհվելուց հետո ռեկորդների սահմանման եւ գրանցման ցանկացած միջոցառում կրում է նրա անունը եւ նվիրվում է նրա հիշատակին: Այս մասին նշեց Նարեկ Սուքիասյանը.

Այսօր ռեկորդներ սահմանած բոլոր պատանիները «Դյուցազնագիրք» դյուցազունների ասոցիացիայի կողմից պարգեւատրվել են պատվոգրերով, նրանց իրենց կատարումներով ողջունել են Սոլակի մշակույթի տան «Սոլակա» պարային համույթի սաները: