Ձերբակալվել է ծեծկռտուքի 8-րդ մասնակիցը․ նոր մանրամասներ ԳՀՎ-ի նախկին սպայի սպանության գործից

Քննչական կոմիտեն բերման է ենթարկել Պոդմոսկովյեում ծեծկռտուքի 8-րդ մասնակցին, որի ժամանակ զոհվել է Գլխավոր հետախուզական վարչության նախկին զինծառայող Նիկիտա Բելյանկինը: Այդ մասին ուրբաթ լրագրողներին հայտնել է Քննչական կոմիտեի պաշտոնական ներկայացուցիչ Սվետլանա Պետրենկոն, հաղորդում է ՏԱՍՍ-ը:

«Հետաքննության արդյունքում բերման է ենթարկվել ութերորդ մասնակիցը: Ներկայումս նրա հետ անցկացվում են քննչական գործողություններ. առաջիկայում կորոշվի խափանման միջոցն ընտրելու հարցը»,-ասել է նա:

Ավելի վաղ Մոսկվայում Կրասնոգորսկի դատարանը կալանել էր ծեծկռտուքի յոթ մասնակիցներին: Ինչպես հայտնել են իրավապահ մարմիններում, դրա մասնակիցների թիվը կարող է հասնել 10-ի: «Արդեն ձերբակալված անձանցից մեկը մեղադրվում է սպանության մեջ (ՌԴ ՔՕ 105 հ.), մնացած յոթ մասնակիցները մեղադրվում են խուլիգանության մեջ (ՌԴ ՔՕ 213 հ.)»,-պարզաբանել է Պետրենկոն:

Ավելի վաղ հաղորդվել էր, որ Քննչական մարմինը բացահայտել է ծեծկռտուքի բոլոր մասնակիցներին առանց բացառության: Նրանցից մի քանիսը հետախուզվում են: «Ռուս հետաքննիչները նաեւ համագործակցում են Հայաստանի իրավասու մարմինների հետ, որոնք հաստատել են անհրաժեշտ աջակցություն տրամադրելու մտադրությունը: Հետաքննությունը կասկած չունի, որ մասնակիցներից եւ ոչ մեկը չի խուսափի քրեական պատասխանտվությունից»,-ասել է Պետրենկոն:

ԳՀՎ-ի նախկին հատուկ նշանակության սպա Նիկիտա Բելյանկինը փորձում էր բաժանել Կրասնոգորսկի շրջանում Նովոտուշինսկի փողոցի վրա գտնվող սրճարանում ծեծկռտուքի մեջ ներքաշված անձանց լույս հունիսի 2-ի գիշերը: Ծեծկռտուքի ընթացքում Բելյանկինը սպանվել է, եւս երկու տղամարդ ստացել են վնասվածքներ: Քննչական մարմինը հարուցել է սպանության, մարմնական վնասվածքներ հասցնելու եւ խուլիգանության մասին քրեական գործ, որի քննության վերջնաժամկետը նշանակվել է 2019 թվականի օգոստոսի 2-ը: