Անդրանիկ Քոչարյանը՝ ՀՅԴ-ի ակցիայի մասին
«Արցախի նախագահի գլուխը քարերով ջարդելը» կոչը բռնության կոչ է: Այս մասին այսօր՝ հունիսի 5-ին, լրագրողների հետ զրույցում ասաց Ապրիլյան պատերազմի քննիչ հանձնաժողովի նախագահ, «Իմ քայլը» խմբակցության պատգամավոր Անդրանիկ Քոչարյանը՝ անդրադառնալով մայիսի 25-ին, Նիկոլ Փաշինյանի աջակիցների հանրահավաքի կազմակերպիչներից Ջիվան Աբրահամյանի հնչեցրած՝ «քարով կցխի Արցախի նախագահ Բակո Սահակյանի գլուխը» սպառնալիքին։
«Ես կարծում եմ, որ մամուլի հրապարակումները պետք է վերցնել հիմա ու համապատասխան գործ հարուցել։ Իսկ Արցախի նախագահի «գլուխը ջարդելը» բռնության կոչ է»,- ասաց նա եւ ավելացրեց՝ իրավապահ մարմինները պետք է ոչ միայն դատապարտեն, այլև պարզեն հետեւանքներն ու կանխեն դրանք։
Անդրադառնալով հունիսի 4-ին ՀՅԴ անդամների կազմակերպված «Ես եմ ծեծել» ակցիային, որի շրջանակում ՀՅԴ–ականները հերթով հայտարարում էին, որ իրենք են ծեծել ՀԱԿ ակտիվիստ Վարդան Հարությունյանին, Քոչարյանն ասաց, որ դա քրեորեն հետապնդելի արարք է, եւ պատկան մարմինները պետք է անմիջապես համապատասխան արձագանք տան։
«Այսպիսի ասացվածք կա՝ «Սովետական միլիցիան ծեծին դեմ է: Քաղաքական մարմնի ներկայացուցիչը երեկ գլուխ էր գովում, որ ինքն է ծեծել, եւ հպարտանում էր: Դա հաջորդեց Ազատության հրապարակում տեղի ունեցած այն հանրահավաքին, որտեղ հպարտանում էին, որ դեղին քարտ են ցույց տվել: Լավ է, որ դեղին են ցույց տալիս, որովհետեւ կարմիր քարտը կնշանակի պետք է գլուխ գովան»,- ասաց Քոչարյանը:
Ավելի վաղ NEWS.am-ը հայտնել էր, որ հունիսի 3–ին ՀԱԿ ակտիվիստ Վարդան Հարությունյանը Facebook-ի իր էջում գրառում էր արել, որ աշխատավայրի մոտ իրեն ծեծի են ենթարկել, մինչ այդ էլ, մի քանի օր առաջ ծեծել են տան մոտ: Նա նաեւ լուսանկար էր հրապարակել բռնության հետքերով: Վարդան Հարությունյանի հետ կապված միջադեպով ոստիկանությունում հարուցվել է քրեական գործ՝ ՀՀ քրեական օրենսգրքի 118 հոդվածի հատկանիշներով: Հունիսի 4-ին, միջադեպի մասնակից լինելու կասկածանքով ոստիկանության բաժին բերման ենթարկվեց, ապա չհեռանալու ստորագրությամբ ազատ արձակվեց ՀՅԴ–ական Յուրա Հովհաննիսյանը։ Կենտրոնի ոստիկանություն հունիսի 4–ին հերթով ներկայանում էին ՀՅԴ–ականները և «Ես եմ ծեծել» ակցիայի շրջանակում նշում, որ իրենք են ծեծել ՀԱԿ ակտիվիստ–ին, որը, հիշեցնենք, պարբերաբար վիրավորական հայտարարություններ է անում ՀՅԴ–ի հասցեին և ՀՅԴ անդամ Հրանտ Մարգարյանի վրա Ազատության հրապարակում հարձակվողներից մեկն է եղել։