Խոսակցություններ կան, որ այդ մարդուն ԺՊ նշանակելուց հետո պարոն Հովհաննիսյանն ինքն է ուզում դառնալ ԵՊՀ ռեկտոր. Մարուքյան (տեսանյութ)
Ես ինձ համար խելոք աշխատում էի իմ աշխատասենյակում, մեկ էլ տեսնեմ, մի ծեր ագռավ, ինչպես պարոն Մելքումյանն է ասում, չէ ագռավ չէ, մեր գործընկներից մեկն իմ մասին ելույթ է ունենում ՀԾԿՀ անդամների թեկնածության հարցի քննարկման ժամանակ։ Այս մասին այսօր՝ մայիսի 30-ին, ԱԺ-ում իր ելույթում նշեց «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով «Իմ քայլը» խմբակցության պատգամավոր Հովհաննես Հովհաննիսյանի՝ իրեն վերաբերող ելույթին։
Նշենք, որ Հովհաննես Հովհաննիսյանը հայտարարել էր, որ ԵՊՀ ռեկտորի ժամանակավոր պաշտոնակատարի ընտրության վերաբերյալ ստահոդ գրառումներ են անում, իսկ Էդմոն Մարուքյանն էլ տարածում է դա:. «Պետք է անկեղծ լինեմ՝ ասեմ, որ դա զարմանալի չի, որովհետև հավանական թեկնածուներից մեկի հետ, որքան գիտեմ, ընկերական հարաբերություն ունի»,-ասել է «Իմ քայլի» պատգամավորը:
Մարուքյանը նշեց, որ ինքը ստիպված է ուղղակի անդրադառնալ « սիրելի գործընկերոջ» հայտարարությանը։ «Ասել էր, որ ես տեղեկություններ եմ տարածել, ընդ որում ստահոդ տեղեկություններ՝ կապված ԵՊՀ-ում ընտրությունների հետ։ Ուզում եմ տեղեկացնել, թե ինչ եմ արել»,-ասաց Մարուքյանը եւ նշեց, որ իր ֆեյսբուքյան պատի վրա կիսվել է հեղափոխության ժամանակ Փաշինյանի մուտքը ԵՊՀ խոչընդոտող սպիտակ մազերով մի մարդու մասնակցության տեսանյութով, ով հիմա ռեկտորի թեկնածու է։
«Կիսվել եմ եւ գրել եմ, որ իշխանությունները այս մարդուն ուզում են դարձնել ԵՊՀ ռեկտորի ժամանակավոր պաշտոնակատար, եւ ասում եմ, որ այս մարդը, որ տենց վատն էր, հիմա լա՞վն է դարձել, հեղափոխակա՞ն է դարձել: Թե դրա ի՞նչն է ստահոդ, չգիտեմ, տեսանյութ է էլի։ Իսկ որ իշխանությունները, ԿԳՆ-ն, պարոն Հովհաննիսյանը նույնպես շահագրգռված են, որ այդ մարդը ընտրվի, հենց խոսում է նրա մասին, որ ինքը արձագանքում է դրան ուրիշ հարցով»,-ասաց նա։
Մարուքյանը նշեց, թե Հովհաննիսյանն անդրադարձել է Ագրարարային համալսարանի ռեկտորի մասին իր հայտարարությանը եւ ասել, թե դրա վրա աչք են փակել, իսկ այս մեկը չեն անի։
«Ուրեմն, լսեք, ինչ ասել եմ՝ ասել են դատի ենք տալու, ասել եմ տվեք, դատի չեն տվել։ Ասել եմ՝ Ագրարային համալսարանի խորհրդի մեջ ներառվել են մարդիկ «Իմ քայլը» դաշինքից, եւ հորդորել եմ իմ սիրելի գործընկերներին ձեռնպահ մնալ այն ժամանակվա բարքերից: Այն ժամանակ ՀՀԿ-ն էր իր մարդկանց մտցնում խորհուրդները, ասել ենք՝ դուք էլ նույնը մի արեք»,-ասաց նա:
Մարուքյանը նշեց, որ «Լուսավոր Հայաստանը» դիտորդ ոչ մի պարագայում չի եղել ու չի էլ լինելու. «Երբ որ մենք տեսնում ենք՝ պրոցես է գնում ու սխալ, պետք է բարձրաձայնենք։ Եթե ձեզ թվում է՝ պետք է նստենք, դիտորդի դերում նայենք, դուք էլ ինչ ուզեք, անեք՝ չի լինելու այդպես:
Ավելին ասեմ, մեր տեղեկություններով, կարող է դա ճիշտ չի, բայց նման խոսակցություններ կան ԵՊՀ-ում, որ այդ սպիտակ մազերով մարդուն ուզում են դարձնել ԵՊՀ ռեկտորի ժամանակավոր պաշտոնակատար, որից հետո պարոն Հովհաննիսյանն ինքն է ուզում դառնալ ռեկտոր։ Ես ձեզ նախապես տեղեկացնում եմ սիրելի գործընկերներ, եթե ինչ-որ մեկը իշխանության մեջ, որը պատգամավոր է գործող, ուզենա դառնա մայր բուհի ռեկտոր, դա կդառնա բոլորիս կողմից հռչակած սկզբունքի կոպիտ խախտում: Ասել ենք, որ կրթական համակարգը չենք քաղաքականացնելու, հիմա գնում ենք, անձամբ խառնվում ենք այդ բաների մեջ»,-ասաց Մարուքյանը:
Ինչ վերաբերում է հայտարարությանը, թե Մարուքյանն ինքն է քաղաքականացնում, վերջինս ասաց, որ ո՛չ ինքը, ո՛չ էլ ԼՀԿ-ն որեւէ լծակ չունեն, որ ազդեն ԵՊՀ-ի վրա. «Նման լծակ ունի իշխանությունը, որը բարի կամք կարող է ունենալ չմիջամտել կամ չունենալ բարի կամք ու միջամտել։ Հիմա, քանի որ մենք տեղեկություն ունենք, որ կարող է միջամտեն, դրա մասին հայտարարում ենք: Բայց այս ամբիոնը պետք չի նման նպատակներով օգտագործել: Եթե իմ ֆեսբուքյան գրառումը ինչ-որ մեկին հուզել է, թող ինքն էլ նման գրառում անի»,-ընդգծեց Մարուքյանը:
Նշենք, որ խոսքը Երեւանի պետական համալսարանի պրոռեկտոր Գեղամ Գեւորգյանի մասին է, ով ազատվել էր զբաղեցրած պաշտոնից՝ անվստահության հիմքով: