Դոն Պիպոյի գործով նախաքննությունն ավարտվել է

Երեք անձի առեւանգման եւ ապօրինի զենք-զինամթերք պահելու համար մեղադրվող Դոն Պիպո մականունով հայտնի Արթուր Ասատրյանի գործի անջատված մասով նախաքննությունն ավարտվել է և ուղարկվել է դատարան։ Այս մասին այսօր՝ մայիսի 23–ին լրագրողների հետ հանդիպմանը հայտարարեց ինքը՝ Արթուր Ասատրյանը պատասխանելով News.am–ի հարցին։

Նա նաև նշեց, որ գրավի դիմաց ազատ արձակվելուց հետո չի դիմել վարույթն իրականացնող մարմնին՝ երկրից բացակայելու խնդրանքով։

Հարցին, թե այդ դեպքում ինչպես է զբաղվում արտերկրում ունեցած բիզնեսի գործերով, Ասատրյանը պատասխանեց.

«Ես թիմ ունեմ, որն առանց ինձ իր գործն անում է, կարևորոը, որ դու կարողանաս ճիշտ թիմ կազմակերպել, որ քեզ չդավաճանեն, ինչը կարծում եմ իմ մոտ ստացվում է»։

Հիշեցնենք, որ Արթուր Ասատրյանը կալանավորվել էր 2018թ. հունիսի 19-ին: Նրան մեղադրանք է առաջադրվել ՀՀ քրեական օրենսգրքի 131-րդ հոդվածի 1-ին, 2-րդ, 3-րդ եւ 6-րդ կետերի («Մի խումբ անձանց կողմից նախնական համաձայնությամբ, առողջության համար վտանգավոր բռնություն գործադրելով, զենքի կամ որպես զենք օգտագործվող առարկաների գործադրմամբ, երեք անձի առեւանգումը») եւ 235-րդ հոդվածի 2-րդ մասի («Մի խումբ անձանց կողմից նախնական համաձայնությամբ հրազեն եւ ռազմամթերք ապօրինի կերպով ձեռք բերելը եւ պահելը») հատկանիշներով: Սեպտեմբերի 20-ին դատարանի որոշմամբ փոխվել էր Ասատրյանի խափանման միջոց կալանավորումը. նա 50 միլիոն դրամ գրավի կիրառմամբ ազատ էր արձակվել կալանքից։ Նշենք, որ Ասատրյանը առանց վարույթն իրականացնող մարմնի թույլտվության կամ գիտության, չի կարող փոխել մշտական բնակության վայրը կամ հատել ՀՀ պետական սահմանը։