Հրապարակվել են Արմեն Գևորգյանի ու Սեյրան Օհանյանի ցուցմունքներից հատվածներ՝ Քոչարյանի գործով

Ռոբերտ Քոչարյանի խափանման միջոցի գործով նիստին նրա պաշտպաններից Հայկ Ալումյանը հրապարակեց Մարտի 1-ի գործով առանցքային մեղադրյալների՝ ՀՀ նախկին փոխվարչապետ Արմեն Գեւորգյանի եւ ՀՀ պաշտպանության նախկին նախարար Սեյրան Օհանյանի ցուցմունքները:

Մասնավորապես նա մեջբերեց Արմեն Գեւորգյանի ցուցմունքից հատվածներ. «Նախագահ Ռոբերտ Քոչարյանը դիմել է ՊՆ եւ Զինված ուժերի ղեկավար կազմին՝ ասելով, որ զինված ուժերը որեւէ կերպ պետք է չմիջամտեն քաղաքական գործընթացներին, չներգրավվեն այդ գործընթացների մեջ, որ բանակում պետք է տիրի կարգ ու կանոն եւ վերջապես պետք է առավել ուշադիր լինել սահմաններում Ադրբեջանի հետ շփման գծում տիրող իրադրության նկատմամբ, քանի որ չի բացառվում, որ Ադրբեջանի կողմից լինեն սադրիչ գործողություններ: Իմ հիշելով՝ նախագահը նաեւ նշեց պաշտպանության նախարարի տեղակալ Մանվել Գրիգորյանի մասին՝ ասելով, որ վերջինս պետք է որոշի՝ պաշտպանության նախարարի տեղակալ է, թե քաղաքական գործիչ: Ես ենթադրում եմ, որ նախագահի նման հայտարարությունը կապված էր հետընտրական գործընթացներին Մանվել Գրիգորյանի ղեկավարած Երկրապահ կամավորական միության անդամների ենթադրյալ ներգրավվածությանը: Ինքը՝ Մանվել Գրիգորյանը, ներկա է եղել խորհրդակցությանը, թե՝ ոչ, չեմ հիշում»,- մեջբերվեց Գեւորգյանի ցուցմունքը: Նա նաեւ ասել է, որ չի հիշում արտակարգ դրություն հայտարարելու եւ բանակը օգտագործելու վերաբերյալ Ռոբերտ Քոչարյանի նման հայտարարություն, ուստի, այդ հարցի շուրջ ոչինչ չի նշել:

Պաշտպան Հայկ Ալումյանը մեջբերումներ արեց նաեւ 2008-ին գլխավոր շտաբի պետ, ՀՀ պաշտպանության նախկին նախարար Սեյրան Օհանյանի ցուցմունքից: Ըստ այդմ՝ Սեյրան Օհանյանը նշել է, որ 2008 թվականի փետրվարի 23-ի ընթացքում քննարկվել են ՀՀ զինված ուժերի մարտունակության խնդիրները, քանի որ այդ օրերին անհրաժեշտություն կար զինված ուժերի զգոնության բարձրացման եւ հակառակորդի կողմից հնարավոր սադրանքների եւ ոտնձգությունների հետ մղման հարցը, որն արտահայտվել է 2008 թվականի մարտի 3-ին տեղի ունեցած դիվերսիայով: «Բոլոր հրահանգները եղել են զինված ուժերի մարտունակության եւ զգոնության բարձրացման վերաբերյալ: Նմանատիպ ցուցում տվել է նաեւ պաշտպանության նախարարը՝ զինված ուժերի ղեկավարությանը եւ նրանց ենթակա անմիջական կառույցների հրամանատարներին»,- իր ցուցմունքներում նշել է Սեյրան Օհանյանը: