Տեսանկարահանող սարքերը հանեցին դատարանի դահլիճից. Մանվել Գրիգորյանի դատը չի նկարահանվում (տեսանյութ)
Երևանի ընդհանուր իրավասության դատարանում մեկնարկել է ԵԿՄ նախկին նախագահ, ԱԺ նախկին պատգամավոր, գեներալ Մանվել Գրիգորյանի և նրա կնոջ՝ Նազիկ Ամիրյանի գործով դատական նիստը: Դատին ներկա է նաև Մանվել Գրիգորյանը, ով մեղադրվում է 6 հոդվածով:
Մինչ բուն դատավարության մեկնարկը, Մանվել Գրիգորյանի պաշտպան Արսեն Մկրտչյանն առարկությամբ դիմեց դատավորին՝ խնդրելով այսօրվա նիստի ընթացքում տեսանկարահանում թույլ չտալ: Պաշտպանի խոսքով` Գրիգորյանի առողջական վիճակը դեռևս բավարար լավ չէ ու, գուցե, կարիք լինի նիստի ընթացքում նրան ժամանակ առ ժամանակ բուժօգնություն ցույց տալ: Նաև նշեց` անձնական տվյալների պաշտպանության հարց կա, քանի որ սա առաջին նիստն է:
Դատավոր Մնացական Մարտիրոսյանը մերժեց լրատվամիջոցների միջնորդությունը նիստը տեսա-լուսանկարահանելու վերաբերյալ: Պաշտպանը հայտարարեց, որ ընթացքի մասին ամենայն մանրամասնությամբ կտեղեկացնեն լրատվամիջոցներին, իսկ հաջորդ նիստերն արդյո՞ք հնարավոր կլինի տեսա-լուսանկարահանել՝ դեռ կքննարկեն:
Դատավորը 2 րոպե ընդմիջում հայտարարեց, որպեսզի տեսանկարահանող սարքերը հանվեն նիստերի դահլիճից: