Ավելի քան 30 հազար մարդ հեռացել է Տրիպոլիից մարտերի պատճառով

Տրիպոլիում ավելի
քան 30 հազար մարդ հեռացել է տնից մարտական գործողությունների պատճառով,
նրանց ճակատագիրը, ովքեր մնացել են մարտական գործողությունների գոտում,
անհանգստացնում է, ասվում է Կարմիր խաչի միջազգային կոմիտեի
հայտարարությունում, տեղեկացնում է ՌԻԱ «Նովոստի»-ն։

ԿԽՄԿ-ի կարծիքով՝ հումանիտար իրավիճակը Տրիպոլիում կտրուկ վատթարացել է
վերջին երեք շաբաթներին։ Ավելի քան 30 հազար մարդ ստիպված է եղել լքել
տները այն շրջաններում, որտեղ ընթանում են մարտական գործողություններ, կան
հոսանքազրկումներ։

«Մենք ամենից շատ մտահոգ ենք խաղաղ բնակիչների ճակատագրով, ովքեր մնացել
են մարտական գործողությունների գոտում։ Հոծ բնակավայրերն աստիճանաբար
վերածվում են մարտադաշտերի»,- ասել է Տրիպոլիում ԿԽՄԿ գրասենյակի ղեկավար
Յունես Ռահուին։ Նրա խոսքով՝ բուժաշխատողների համար վտանգավոր է դառնում
վիրավորներին տարհանելը գնդակոծությունների պատճառով։

«Սկզբունքորեն կարեւոր է, որպեսզի հիվանդանոցները եւ
բուժհաստատությունները, նրանց աշխատակիցները եւ վիրավորներին տեղափոխող
մեքենաները հնարավորություն ունենան կատարելու իրենց աշխատանքը»,- ասել է
ԿԽՄԿ ներկայացուցիչը։

Լիբիական ազգային բանակի մարշալ Խալիֆա Հաֆթարը ապրիլի 4-ին հրամայել էր
իր ուժերին սկսել Տրիպոլիի գրոհը՝ «ահաբեկիչներից ազատագրելու համար»։
Հաֆթարի բանակի ստորաբաժանումները վերահսկողություն են սահմանել Գարյան եւ
Սուրման քաղաքներում։ Տրիպոլիում կառավարությանը լոյալ զինված
կազմավորումները հայտարարել են ընդդեմ Հաֆթարի «Ցասման հրաբուխ»
գործողությունն սկսելու մասին։

2011 թվականին Լիբիայի նախագահ Մուամար Քադաֆիի տապալումից եւ
սպանությունից հետո Լիբիան փաստորեն միասնական պետություն չէ։ Հիմա երկրում
երկիշխանություն է տիրում։ Արեւելքում ժողովրդի ընտրած խորհրդարանն է, իսկ
արեւմուտքում՝ Տրիպոլի մայրաքաղաքում, կառավարում է ՄԱԿ եւ Եվրամիության
օժանդակությամբ ձեւավորված ազգային համաձայնության կառավարությունը՝ Ֆայեզ
Սարաջի գլխավորությամբ։ Արեւելյան մասի իշխանությունները գործում են
Տրիպոլիից անկախ եւ համագործակցում են Լիբիական ազգային բանակի հետ։