Փաշինյանը՝ Ջանջուղազյանին

Կառավարությունն իր այսօրվա՝ ապրիլի 25-ի նիստում հավանություն տվեց 2018 թվականի պետական բյուջեի կատարման տարեկան հաշվետվությանը եւ այն սահմանված կարգով ներկայացվեց Ազգային ժողով:

Նշենք, որը 2018-ին պետական բյուջեն եկամուտների գծով կազմել է 1,341,690,590.9 հազար դրամ, ծախսերի գծով` 1,447,083,011.5 հազար դրամ, բյուջեի դեֆիցիտը` 105,392,420.6 հազար դրամ:

Ֆինանսների նախարար Ատոմ Ջանջուղազյանը նշեց, որ հաշվետվությունը ավելի քան 4700 էջ է:

«Բյուջեի օրենքը հիմնված է կանխատեսումների վրա, իսկ կանխատեսումներն իրենց մեջ ռիսկեր են պարունակում: բացի օբյեկտիվ այս գործոններից, 2018-ին տեղի են ունեցել իրադարձություններ, որոնք չէին կարող ազդեցություն չունենալ բյուջեի կատարողականի վրա: Անգամ թեթեւ իրադարձություններն են ազդում սպասումների վրա, իսկ 2018-ին տեղի ունեցած իրադարձությունները չենք կարող գնահատել մեղմ: Եթե խուսափենք հեղափոխություն բառն օգտագործելուց, տնտեսության տեսակետից չափազանց նշանակալի իրադարձություններ են եղել»,-ասաց Ջանջուղազյանը:

Վարչապետ Նիկոլ Փաշինյանն էլ արձագանքեց. «ինչո՞ւ եք խուսափում հեղափոխություն բառից»:

Ջանջուղազյանը շարունակեց. «Վերադառնանք 2018-ին հաճախի արվող շահարկումներին, թե անվտանգության, թե արտաքին հարաբերությունների, տնտեսական, սոցիալական պարտավորությունների կատարման տեսակետից հնարավոր ռիսկերի առումով, եւ արձանագրենք, որ այդ ամենը բացի շահարկումից այլ հետեւանք չի ունեցել: Միաժամանակ չենք կարող հաշվի չառնել, որ ցանկացած շարժում ունի իներցիա: բայց այստեղ խնդիրն այն է, թե ինչն է, որ ունի իներցիա եւ ինչն է, որ մերժվել է այդ իներցիայի տեսակետից:

Կանխատեսվում էր, որ ՀՆԱ-ն կաճի 4,9 տոկոսով: Եթե նույնիսկ անկում լիներ, դա կլիներ օրինաչափ երեւույթ՝ հաշվի առնելով 2018ժ-ին տեղի ունեցած փոփոխությունները, սակայն արձանագրվել է 5,2 տոկոս աճ»:

Ֆինանսների նախարարը նաեւ տեղեկացրեց, որ ՀՆԱ-ի Ճյուղային կառուցվածքը շարունակում է մնալ ոչ նպաստավոր, եւ աճի մեջ ամենամեծ դերն ունեցել է ծառայությունների ոլորտում աճը:

«2018-ին հարկեր/ՀՆԱ հարաբերակցությունը կազմել է 21 տոկոս, 2017-ին եղել է 20,8 տոկոս»,-ասաց նա: