Ես հպարտ եմ իմ տատիկով. հազարավոր հայ երեխաներին փրկած Մարիա Յակոբսենի թոռ
Դանիացի միսիոների,
Բեյրությում Ցեղասպանությունից փրկված երեխաների համար «Թռչնի բույն»
մանկատան հիմնադիր Մարիա Յակոբսենի թոռը՝ Ռուբեն Ալբեշյանը կիսվել է իր տատիկի մասին հիշողություններով:
Այսօր՝ ապրիլի 24-ին, Ռուբենը ծաղիկներով եկել էր Ծիծեռնակաբերդում տատիկի հուշատախտակի մոտ:
«Ամեն տարի ծաղիկներով գալիս եմ: Ես հպարտ եմ իմ տատիկով: Մենք բոլորս
հպարտանում ենք նրանով, երեխաներին փրկելու գործում նրա ավանդի համար», -
ասաց Մարիայի թոռը, որին բարեգթության համար «հազարավոր երեխաների մայր»
էին ասում:
Ռուբենի ընտանիքը Հայաստան է վերադարձել անցյալ դարի կեսերին եւ
բնակություն հաստատել Թումանյանի շրջանի Օձուն գյուղում: Գյուղում մայրը
մանկապարտեզ է հիմնադրել եւ ընդհուպ մինչեւ մահն աշխատել այնտեղ: Ռուբենը
տեղափոխվել է Երեւան, ունի երկու քույր:
Հայոց ցեղասպանության ինստիտուտ թանգարանի ցուցադրության մի մասը
նվիրված է Մարիա Յակոբսենին: Այստեղ պահվում է նաեւ Մարիա Յակոբսենի հայտնի
օրագիրը: Նրա կողմից Բեյրությում հիմնադրած մանկատունը մինչեւ այսօր
գործում է:
«Սա յուրահատուկ մանկատուն է, որտեղ երեխաները չեն մոռանում իրենց ազգային պատկանելիությունը»:
«Կան Ցեղասպանության ականատեսներ, այդ թվում Մարիա տատիկը, կան
փաստաթղթեր եւ փաստերը ժխտելու Թուրքիայի փորձերն անիմաստ են: Մյուս
տատիկս՝ Եվան, փախել է Թուրքիայից», - պատմեց Ռուբենը: Նրա երազանքն է, որ
Մարիա տատիկի անունով Երեւանում դպրոց կամ փողոց անվանեն: Լինելով դանիացի
եւ լավ ընտանիք ունենալով՝ Մարիա Յակոբսենը թողել է բարեկեցիկ կյանքը եւ
եկել Հայաստան, որտեղ սով եւ պատերազմ էր:
«Այսօր ես տատիկիս ծաղիկներ եմ բերել: Ինձանից հետո ծաղիկներ են բերելու իմ որդիներն ու թոռները», - թախծոտ ժպտում է Ռուբենը:
«Տատիկս միակ կինն է, որը ստացել է Դանիայի բարձրագույն պարգեւը՝ Ոսկե մեդալը»: