Բոլորի ուզածն այն է, որ մեր հարաբերությունները վատանան․ Ծառուկյանն` իր և Փաշինյանի հարաբերությունների մասին

ԲՀԿ խմբակցության ղեկավար Գագիկ Ծառուկյանն այցելել է Ծիծեռնակաբերդ և հարգանքի տուրք մատուցել Հայոց ցեղասպանության զոհերի հիշատակին։

Նա լրագրողների հետ զրույցում անդրադարձել է Ցեղասպանության միջազգային ճանաչման խնդրին.

«Բոլորս էլ տեսնում ենք, որ արդեն ճանաչելու ճանապարհին ենք։ Սա ոչ միայն կառավարության, իշխանության, խորհրդարանի, այլև ողջ աշխարհի հայության պատվի խնդիրն է։ Դուք էլ եք զգում, որ արդեն կարճ ժամանակ է մնացել, որ Թուրքիան իր պատասխանը տա ողջ աշխարհին։ Մենք տեսնում ենք, որ ամեն տարի ապրիլի 24-ին մարդիկ սգում են»։

Գագիկ Ծառուկյանի խոսքով՝ մենք պետք է կարողանանք մեր բոլոր կապերով ներկայացնել ամեն ինչ, քանի որ արդարությունը հիվանդանում է, բայց չի մահանում։

Նա նշեց, որ Թուրքիան ճանաչելուց բացի, պիտի տարածքային, ֆինանսական, բարոյական փոխհատուցում տա։

Գագիկ Ծառուկյանը նաև անդրադարձել է իրեն պատկանող «Արարատցեմենտ» գործարանի շուրջ ստեղծված իրավիճակին և նշել․

«Ուզում են խառնեն ալիքները, պղտորեն, մարդը մատը մատին չի տվել, այսօր խոսում է ներդրումներից։ Մեր ազգը շատ աշխատասեր է: Դուք բոլորդ հիշում եք՝ սպորտը, որ Ծառուկյանը վերցրեց, մի քանի տարի մեդալներ չկար։ Վերցրեցինք, աշխատացրինք, իհարկե, հիմա էլ խնդիրներ կան, բայց մենք աշխարհի օլիմպիական խաղերից մեդալներ ենք բերում, անհնարին ոչինչ չկա»։

Գագիկ Ծառուկյանը նշեց, որ ինքն ինչ քանդած ոլորտ վերցրել է, ծաղկել են։

Լրագրողների այն դիտարկմանը, թե նրա և Նիկոլ Փաշինյանի հարաբերությունները վատացել են, Գագիկ Ծառուկյանն ասաց․

«Բոլորի ուզածն այն է, որ մեր հարաբերությունները վատանան, այդպիսի բան չկա․ հանգիստ թողեք տնտեսությունը զարգանա։ Վարչապետին խնդիրը պետք է ճիշտ ներկայացնել, իսկ սխալ ներկայացողները պատասխան են տալու»։