Լարված իրավիճակ Թբիլիսիում․ Տոնական միջոցառում Թուրքիայի դեսպանատան առջև՝ «Պահանջում և հատուցում» ակցիայի ֆոնին (տեսանյութ)
Թբիլիսիում Թուրքիայի դեսպանատան առջև իրավիճակը լարված է։ Մի կողմից վիրահայերն ապրիլքսանչորսյան «Պահանջում և հատուցում» խորագրով բողոքի ցույց են անցկացնում, մյուս կողմից դեսպանատունը տոնական միջոցառմամբ նշում է երեխաների օրը: Հնչում են մանկական երգեր, անցկացվում է Աթաթուրքի նկարներով ցուցահանդես: Թուրք երեխաները երգում-պարում են: Միմոսի հագուստով մի մարդ անցորդներին թուրքական ու վրացական դրոշների պատկերներով փուչիկներ է բաժանել: Նախորդ տարի այս օրը դեսպանատան մոտ հակաակցիա էին անցկացնել ադրբեջանական համայնքի ներկայացուցիչները:
Այդուամենայնիվ, բարձր հնչող երաժշտության ու պարի ֆոնին կայացել է վիրահայ համայնքի ներկայացուցիչների ցույցը: Համայնքի ներկայացուցիչներին նախօրոք կոչ էր արվել չտրվել սադրանքներին և խաղաղ ցույց անցկացնել: Վիրահայոց համայնքը դժգոհություն է արտահայտել դեսպանատան դիմացի տարածքները 3 մասի բաժանելու համար: Մեջտեղում վրացի ոստիկաններն են, նրանց երկու կողմից՝ հայկական ու վրացական պետական դրոշներով ապրիլ 24-ին նվիրված հայկական միջոցառումն է անցկացվում, մյուս կողմից` վրաց-թուրքական դրոշների ներքո դեսպանատան միջոցառումն է ընթանում:
Ոստիկանությունը դեսպանատան տարածքը բարիկադներով բաժանել էր երեք մասի՝ մեջտեղում կանգնել էր ոստիկանությունը, մի կողմում թուրքերի միջոցառումն էր, որի մասնակիցները, մինչև հայկական կողմի ակցիայի ավարտը, բարձրախոսներով ցանկանում էին լռեցնել հայկական կողմի ելույթները: Հայկական համայնքին, մասնակիցների խոսքերով, հատկացվել էր դեսպանատան հեռավոր անկյունը:
Հարգանքի տուրք մատուցվեց Հայոց Եղեռնի զոհերի հիշատակին: Ելույթներ ունեցան հայկական համայնքի ներկայացուցիչները: Թուրքիայի նախորդ դարի հայատյաց գործողությունների և ներկայիս ակցիայի մասին ելույթ ունեցավ ներկաներից մեկը:
Տպավորիչ էր վիրահայ համայնքի ակտիվիստ, «Արձագանք» հարթակի ղեկավար Գեորգի Թումասյանի ելույթը հայերենով, վրացերենով ու անգլերենով: Ստորև կներկայացնենք նրա վրացերեն ելույթի հայերեն թարգմանությունն ամբողջությամբ.
«Այսօր մեծ Ճավճավաձե պողոտայում, Իլյայի արձանի մոտից, որտեղ մի կողմում լույսն է, մյուսում խավարը, դիմում եմ Վրաստանի իշխանություններին, հասարակությանը: Այսօր մենք այստեղ հավաքվել ենք ոգեկոչելու 1915 թ Հայոց Եղեռնի զոհերի հիշատակը, որի հիման վրա ՄԱԿ-ն ընդունեց ցեղասպանություն տերմինը: Մինչդեռ, մյուս կողմում կանգնած մարդիկ մեր ակցիան վերածեցին ծաղր ու ծանակի, նրանք, ովքեր ծաղրում են 1,5 մլն զոհերին, ծաղրում են նաև մեր ճակատագրին արժանացած հույներին, ասորներին: Չմոռանանք նաև Աջարիայի պատմությունը թուրքական տիրապետության ժամանակ: Վրացի ժողովրդի պայքարի արդյունքն է, որ այսօր Աջարիան Վրաստանի կազմում է: Ուզում եմ ընդգծել, որ Վրաստանը ժողովրդավարական պետություն է և միշտ պետք է այդպիսին լինի …Թուրքիայի այսօրվա արարքը Վրաստանում անընդունելի է: Հայոց ցեղասպանությունն ընդունելու համար շնորհակալություն եմ հայտնում ՄԱԿ-ին, ԵԽ-ին, ԵԽԽՎ-ին, նաև այն տասնյակ պետություններին, որոնք ընդունել են Հայոց ցեղասպանությունը, այդ թվում Ֆրանսիային, որտեղ այսօր պետական մակարդակով նշում են Հայոց ցեղասպանության տարելիցը»: