Ընտանեկան բռնություններին վերաբերող օրենքը քննարկվել է Շիրակի մարզում

Անցած տարվա հունվարի 30-ից կիրառություն է ստացել «Ընտանիքում բռնության կանխարգելման, բռնության ենթարկված անձանց պաշտպանության մասին» օրենքը, իսկ 2018 թվականի հունիսի 30-ից բռնարարների խնդրով սկսել են զբաղվել ոստիկանները։ Օրենքի կիրառության շուրջ Շիրակի մարզպետարանում քննարկում է անցկացրել ոստիկանության 3-րդ վարչության պետ Նելլի Դուրյանը։ Ընտանեկան բռնությունների խնդիրների շուրջ քննարկումներ տարվում են հանրապետության բոլոր մարզերում, «Մարդու իրավունքների խթանում և պաշտպանություն» ծրագրի շրջանակներում:

Մինչ օրենքի կիրառությունը, հստակ տվյալներ չկային բռնությունների զոհ դարձածների ու բռնարարների թվի մասին, իսկ խնդրով հիմնականում զբաղվում էին հասարակական կազմակերպությունները: Հիմա վիճակագրությունը, որը վերաբերում է նախորդ 9 ամիսներին, փաստում է հետևյալը՝ հանրապետության ոստիկանական բաժանմունքներ ստացվել է 1438 հաղորդում, 193-ի դեպքում անհետաձգելի միջամտություն է ցուցաբերվել, 843 բռնարար անձ է հաշվառվել։

Ըատ իրավապահների՝ ունենալով օրենք՝ հնարավոր կլինի պաշտպանել այն անձանց, ովքեր ենթարկվում են բռնության, կանխարգելել այն, որպեսզի հետագայում չվերածվի սպանության: Բռնությունների կանխարգելման գործում դերակատարություն վերապահվում է Սոցիալական հարցերի նախարարությանը, ի դեմս սոցծառայությունների, որոնք ընտանիքների հետ պետք է աշխատեն: Դպրոցների, կրթական այլ հաստատությունների դերն էլ պակաս չի կարևորվում: Հաճախ ընտանեկան բռնությունների պատճառով են լինում նաև անչափահասների ինքնասպանության դեպքերը: Այն ընտանիքում, որտեղ բռնություն կա, երեխաները ոչ միայն ֆիզիկական, այլև հոգեբանական ճնշումների են ենթարկվում:

Ինը ամիսների վիճակագրությունում Գյումրիում բռնության դեպքերի մասով հաղորդումներ քիչ են եղել, ինչը, ըստ ոլորտի պատասխանատուների, իրական պատկերը չէ: Շիրակի մարզպետարանի կանանց, երեխաների իրավունքների պաշտպանության բաժնի պետ Լիլիթ Գորգինյանի բացատրությամբ՝ շատերն են հողաթափերով ու տան հագուստով փախել բռնարարից, իրենց մոտ եկել, խնդրել օգնել, բայց միայն 1 պայմանով, որ ոստիկանություն չդիմեն:

Ոմանք էլ այն կարծիքին են, որ ոստիկանների նկատմամբ վստահության պակաս կա, ու այդ վստահությունը վերականգնելու համար օրինակներ են պետք, որպեսզի դրանց միջոցով մարդկանց իրազեկեն, որ ոստիկանն իր գործը պատվով է անում: Իսկ օրենքը զոհին բռնարարից պաշտպանելու 3 միջոց է նախատեսում. նախազգուշացում, անհետաձգելի միջամտություն, նաև դատավորի պաշտպանական որոշման ընդունում: Այս մասին բռնության ենթարկվածը եթե իրազեկված լինի, ապա ըստ Նելլի Դուրյանի՝ դիմելիության ցուցանիշը կփոխվի:

Բռնության ենթարկվածների համար հանրապետության մարզերում աջակցության կենտրոններ են բացվել, որից մեկն էլ Գյումրիում է, սակայն այդ ցերեկային կենտրոնները լիարժեք չեն գործում, ու հիմնականում, ըստ ոմանց, ձևական բնույթ են կրում: Քննարկման մասնակիցները բռնություններ ծնող պատճառներից մի քանիսը թվարկեցին՝ միանշանակ շեշտելով, որ ընտանիքի սոցիալական վիճակը բռնությունների հետ ուղղակի կապ չունի: