Ոստիկանները հայտնաբերել են Նորագավիթում կատարված բնակարանային գողության համար հետախուզվողին

Մայիսի 29-ից հունիսի 3-ը Նորագավիթի 3-րդ փողոցի մի տնից գողություն էր կատարվել: Պատուհանով մտել էին տուն, ննջարանի պահարանից հափշտակել 600.000 դրամ ու փախել:

Գողության մասին ահազանգը ոստիկանության Շենգավիթի բաժնում ստացվեց հունիսի երեքին: Տուժողը որևէ մեկին չէր կասկածում: Մոտ երեք օր տնից բացակայելուց հետո վերադարձել էին ու տեսել, որ փողը չկա:

Նորագավիթ մեկնած օպերատիվ խումբը ձեռնարկեց բացահայտման համար անհրաժեշտ բոլոր միջոցառումները, որոնց արդյունքում ստացված տեղեկությունները վկայում էին, որ բնակարանագողն ամենայն հավանականությամբ նույն գյուղից է:

Դեպքի վայրերից վերցված մատնահետքերն ուղարկվեցին ոստիկանության փորձաքրեագիտական վարչություն: Մատնադրոշմային քարտերի ուսումնասիրությունը ցույց տվեց, որ կասկածյալի մատնահետքերը նույնական են գողության համար նախկինում դատպարտված Նորագավիթի 3-րդ փողոցի բնակիչ Ռուստամ Եղիազարյանի մատնահետքերի հետ, ում ոստիկաններն արդեն կասկածում էին:
Սակայն նրան հայտնաբերել չհաջողվեց:

Սեպտեմբերի 7-ին Ռուստամ Եղիազարյանի նկատմամբ հայտարարվեց հետախուզում: Որոնողական աշխատանքները շարունակվեցին: Եվ հետախուզում հայտարարելուց օրեր անց` սեպտեմբերի 12-ին ոստիկանության Կենտրոնական բաժնի ծառայողները Պուշկինի փողոցում հայտնաբերցին Եղիազարյանին և բերման ենթարկեցին ոստիկանության Շենգավիթի բաժին:

Ժողովրդական ասույթին հակառակ տուժողը դուռը փակ էր պահել, հարևանին էլ չէր կասկածում: Բայց դրկից Ռուստամ Եղիազարյանը որպես թիրախ հենց նրա տունն էր ընտրել:

Դեպքի հանգամանքները պարզվում են:
Գողության փաստով հարուցված քրեական գործի նախաքննությունը շարունակվում է: