Ռոմանտիկ էի, բնության սիրահար, կենդանիների մեծ սիրահար, լավատես. Արամ Մանուկյան

Operativ.am-ի բլից հարցերին պատասխանում է ՀԱԿ խմբակցության պատգամավոր Արամ Մանուկյանը: Նրա հետ խոսել ենք մանկությունից, երազանքներից, նախասիրություններից և այլն:

-Կնշե՞ք, թե որն է Ձեր նախընտրած վայրը Երևանում:

-Այն վայրը, որտեղ կանաչ կա, որտեղ ծառ կա:

-Ձեր հոբբին…

-Նկարչությունն է: Հաճախ չեմ նկարում, սակայն որքանով որ կարողանում եմ, որքանով որ նյարդերս հանգիստ են լինում, նկարում եմ:

-Կասեք, թե ո՞րն է սիրած երգը…

-Սիրում եմ դասական երաժշտություն, որը լսելը այդքան հեշտ չէ, դա լսելու համար ժամանակ է պետք և ականջների դաստիարակություն: Այսինքն՝ շատ եմ սիրում խորիմաստ և ոչ մատչելի երաժշտություն:

-Ի՞նչն է Ձեզ գրավում մարդկանց մեջ:

-Անկեղծությունը, համարձակությունը:

-Իսկ ի՞նչն է վանում:

-Քծնանքը, վախը…

-Իսկ ինքներդ ինչի՞ց եք վախենում:

-Դավաճանությունից, ընկերներիս դավաճանությունից:

-Ինչպիսի՞ն էր մանուկ Արամ Մանուկյանը:

-Ռոմանտիկ էի, բնության սիրահար, կենդանիների մեծ սիրահար, լավատես:

-Շա՞տ բան է փոխվել:

-Բավականին, գույները մգացել են, պայծառ գույները խամրել են:

-Ի՞նչ կցանկանայիք ետ բերել անցյալից:

-Ոչինչ, ես սխալներ չեմ գործել անցյալում, ապրել եմ ճիշտ, եղել եմ առատաձեռն: Դժգոհելու բան չունեմ, հետևաբար ոչինչ չէի ցանկանա ետ բերել:

-Ի՞նչ է Ձեզ համար երջանկությունը:

-Ուրիշին երջանկացնելը:

-Երազանք, որն արդեն իրականացել է...

-Անկախության հռչակումը…

-Կցանկանայի՞ք ինչ-որ բան փոխել ինքներդ Ձեր մեջ:

-Կուզեի մի քիչ ավելի կտրուկ լինել:

-Երբ զայրանում եք…

-Հանգստանում եմ, երաժշտություն եմ լսում, աշխատում եմ մարդկանցից հեռու լինել:

-Եթե Դուք նախագահ լինեիք…

-Չէի լինի, որովհետև դա իմ ուսերից վեր է:

-Ինչպե՞ս եք պատկերացնում Ձեր կյանքը 5տարի անց:

-Կուզեմ իշխանափոխություն լինի, երկրում հանգիստ վիճակ ստեղծվի, որ մարդիկ հոգեպես ավելի հանգիստ լինեն:

Զրուցեց Նազենի Բաղդասարյանը