Ոչ մի թիզ հող, մենք արյան վերջին կաթիլով, ատամի վերջին կրճտոցով չպետք է թույլ տանք, որ որևէ մեկը խոսի հող տալու մասին. քաղաքագետ
Այսօր՝ օգոստոսի 17-ին, լրագրողների հետ հանդիպման ժամանակ քաղաքագետ Լևոն Շիրինյանը խոսեց ՌԴ պաշտպանության նախարար Սերգեյ Շոյգուի գլխավորած պատվիրակության Հայաստան ժամանման, ինչպես նաև Բակո Սահակյանի՝ օրերս տված հարցազրույցի մասին:
Լևոն Շիրինյանի խոսքով՝ ապրիլից սկսած, մենք՝ բոլորս, որպես ժողովուրդ, ինտենսիվ, հոգեբանական և քարոզչական մշակման ենք ենթարկվում:
«Եթե տարածքների հանձնման խոսակցությունները բերեցին «Սասնա ծռեր»-ի զինված ապստամբության, ապա այլ պարագայում, կարող են ինստիտուտներ ապստամբել: Դրա համար, ես կարծում եմ, որ դա քարոզչական ոլորտի մասն է: Իմ հասկացածով կարող եմ ասել, որ քարոզչական ինտենսիվ պատերազմի մեջ ենք՝ խոսքերը, քայլերը, գրգռությունները տարբեր են, բայց, եթե ամփոփենք, կլինի այսպես, որ հայ ժողովրդը և Հայաստանի երկու պետականություններն ունեն մեկ շահ՝ «Ոչ մի թիզ հող»: Ես օրինակ կողմ եմ, որ արյան վերջին կաթիլով, ատամի վերջին կրճտոցով մենք ոչ մեկին չպետք է թույլ տանք մի թիզ հողի զիջման մասին անգամ խոսք ասի»,-ասաց քաղաքագետ Լևոն Շիրինյանը և հավելեց,- «Ակնհայտ է, որ եթե մենք դինամիկան ենք նայում, ապա 1878 թվականին, երբ Հայկական հարցը միջազգայնացավ, Բեռլինի կոնգրեսով մենք նահանջելով, ոչնչանալով գալիս ենք՝ մարդկային ռեսուրսով, մակույկով, նյութական ռեսուրսով: Մենք մեր լեռնաշխարհի հյուսիս-արևելյան՝ մեր տրմադրության տակ ունենք 43 000 քառակուսի կիլոմետր տարածք: Այս պարագայում, մեր հարցը վերջացած, փակված է ընդմիշտ: Կունենանք շատ լավ հայ ժողովուրդ Սփյուռքում, բայց այստեղ չենք լինի: Դրա համար, այս խոսակցություններն իմ կարծիքով վերածում են կենաց ու մահվան խնդրի և սա թող սարսափելի չթվա, երբ մենք որդեգրում ենք այդ տեսակետը, մենք միշտ խախտում ենք: Ես պետք է արժևորեմ նաև այն, որ հավանաբար, այս հոգեվիճակի արտացոլումն էր հուլիսի 17-ի ապստամբությունը: Դա Հայաստանի կանչն է, և թե ով, ինչպես կգնահատի՝ դա իր շահն է»:
Անդրադառնալով Բակո Սահակյանի հայտարարությանը քաղաքագետը նշեց, որ նա ասել է. «Ես ով եմ, որ տարածք տամ կամ չտամ: Արցախն ունի ինքնիշխան ժողովուրդ, Սահմանադրություն»: