ԲԱՑԱՌԻԿ հարցազրույց՝ նկարահանման տաղավարից. թե ինչպես կայացավ երգիչ Մարտ Բաբայանի և ռուս օպերային երգչուհու «խելահեղ» համագործակցությունը (լուսանկարներ և տեսանյութ)
LifeStyle«Հայաստանի ձայնը» նախագծից առավել հայտնի դարձած Մարտ Բաբայանը հերթական դուետը կունենա: Այս անգամ այն կլինի ռուս օպերային երգչուհու՝ Աննա Գալկինայի հետ: Մարտն ու Աննան 10 տարվա ընկերներ են և նաև համագործակցում են. Մարտը երաժշտությունն է գրում, իսկ Աննան՝ խոսքեր: Սա նրանց առաջին դուետն է:
Operativ.am-ի թղթակիցը ներկա է գտնվել նկարահանման գործընթացին: Ձեր ուշադրությանն ենք ներկայացնում բացառիկ հարցազրույց երգիչների, պրոդյուսերի և ռեժիսորի հետ, ինչպես նաև կադրեր՝ տեսահոլովակի նկարահանումից:
Օperativ.am-ի թղթակցի հետ զրույցում Մարտի պրոդյուսերը՝ Սոֆիա Գուլյանը, ով արդեն 3-րդ տարին է, ինչ աշխատում երգչի հետ, հայտնեց, որ երգը երկու գիժ ընկերների մասին է, որի հերոսները հենց իրենք են՝ «գժերը»: Երգը կոչվում է «Сумасшедшие»: Առաջարկը եղել է Աննայի կողմից, և քանի որ Մարտը հիմա պատրաստվում է դուետների ալբոմ թողարկել, համաձայնել են հերթական դուետն ունենալ:
«Աննայի հետ 10 տարվա ընկերներ ենք: Նա ապացուցել է, որ կնոջ և տղամարդու միջև հնարավոր է ընկերություն: Մի անգամ նրան ասացի, որ երաժշտություն եմ գրել և չգիտեմ, թե ում դիմեմ խոսքերի համար, նա էլ ինձ հեռախոսահամար տվեց, որպեսզի զանգեմ և պայմանավորվեմ: Զանգեցի, պարզվեց՝ Աննան իր համարն էր տվել և այդպես սկսվեց մեր առաջին համագործակցությունը»,-պատմում է Մարտը:
Երգիչը պատմեց նաև, որ Աննա Գալկինան ցանկացել է, որ Հայաստանում ևս իմանան իր մասին, ճանաչեն, ուստի առաջարկել է միասին դուետով հանդես գալ, իսկ ինքն էլ սիրով համաձայնել է:
Այն հարցին, թե ինչու հատկապես շեշտը դրվեց դուետների վրա, Մարտը պատասխանեց. ««Հայաստանի ձայնը» նախագիծն ինձ բավականին հայտնի դարձրեց, որից հետո արդեն ես իրավունք չունեի այդ մակարդակից ներքև իջնել: Մարդիկ ճանաչեցին Մարտ Բաբայան երգչին և սպասում էին նորությունների: Այդ ժամանակ մտածեցինք Քրիստինե Պեպելյանի, Աննա Սեմենովիչի հետ դուետի մասին, որոնք իսկապես ծառայեցին իրենց նպատակին: Ես շատ շնորհակալ և ուրախ եմ նրանց հետ համագործակցելու համար»:
Մարտն իր խոսքում նշեց նաև, որ թեև բոլոր դուետներն էլ հաջողվել են, և ամեն բան լավ է ընթացել, սակայն հայերի հետ աշխատելն ուրիշ է.«Ռուսաստանում ամեն բան այլ է: Այնտեղ խիստ է դրվածքը՝ սառը: Ուսումնասիրելով Ժոռ Մելոյանի գործերը, ով տեսահոլովակներ է նկարել և՛ ռուս և՛ հայ աստղերի համար, և վստահ լինելով նրա ունեցած բարձր պրոֆեսիոնալիզմին, որոշեցինք համագործակցել, այն էլ միանգամից 3 գործով: Ռուսաստանում 30-40 անգամ թանկ ես վճարում, սակայն ոչ միշտ է արդյունքը լավ լինում»,-անկեղծացավ երգիչը:
Համագործակցության և երգերի նկարահանման ընթացքի մասին խոսեցինք նաև ռեժիսոր Ժոռ Մելոյանի հետ. «Համագործակցությունը կախված մի քանի հանգամանքից, որոնք տվյալ դեպքում ինձ համար արդարացված են: Երևում է, որ մարդիկ աշխատած են, պրոֆեսիոնալ իրենց գործում, և ես սիրով համաձայնել եմ համագործակցել: Վաղ է ասել այն հիթ կդառնա, թե ոչ, քանի որ աշխատանքը պարզ կլինի միայն ավարտին հասցնելուց հետո, սակայն կարող եմ ասել, որ կրեատիվ մտածված բաներ շատ են լինելու տեսահոլովակում, քանի որ ամեն բան մանրակրկիտ է պատրաստված»,-ասաց Ժոռ Մելոյանը:
Ռեժիսորի խոսքով՝ հաշվի առնելով տեխնիկական ռեսուրսներն ու տեղանքները միանգամից 3 տեսահոլովակ է նկարահանվում: 1-ին տեսահոլովակն Աննայինն է, որտեղ նա փորձել է իրեն փոփ ոճում ներկայացնել: Այն հագեցած է այսօրվա արդի տեխնիկական միջամտություններով: 2-րդը՝ լիրիկական: Այն որևէ սյուժե չունի, առկա է կուլմինացիա, վիզուալ մաքուր հետաքրքիր կադրեր: 2-րդ տեսահոլովակը Մարտի և Աննայի դուետն է, որն ամբողջությամն խելահեղ գործողություններով լի է: 3-րդն ամբողջությամբ սյուժետային է:
Մեր թղթակիցը զրուցեց նաև ռուս օպերային երգչուհու հետ, պարզելու նպատակով, թե ինչն է նրան գրավել Հայաստանում: Վերջինս առաջին անգամ է Հայաստանում:
Աննա Գալկինային Երևանը շատ է դուր եկել, բայց ամենից շատ՝ ջուրը, խմում է խմում ու չի հագենում: Երգչուհուն շատ է դուր եկել նաև հայկական խոհանոցը:
Այն հարցին, թե կցանկանա, որ իր ամուսինը հայ լինի, Գալկինան պատասխանեց. «Հայաստանում ես որոշակի կաշկանդվում եմ: Ռուսաստանյան շփումն այստեղ անընդունելի է: Հայ տղամարդն ինձ 2 օր էլ չի հանդուրժի: Իսկ եթե ավելի լուրջ, ապա ես սեր եմ ուզում և կապ չունի թե տվյալ դեպքում տղամարդն ինչ ազգության կլինի՝ հայ, ռուս, տաջիկ, վրացի, թե ամերիկացի: Կարևոր չէ, միայն թե սեր լինի, բայց քանի դեռ սեր չկա, ապա նշանակում է, որ ոչինչ չկա»:
Գալկինան նաև նշեց, թե ինչու է հենց Մարտի հետ որոշել դուտ երգել:
«Թող ինձ ներեն բոլոր նրանք, ովքեր կարծում են, որ երգել գիտեն, բայց ես կարծում եմ, որ Մարտը Ռուսաստանում լավագույնն է: Դա իմ համոզմունքն է, և ես կարող եմ դա ասել բոլորի երեսին»,- ասաց Գալկինան:
Չնայած գեղեցկուհիների հետ շփմանը, Մարտ Բաբայանը խոստովանեց, որ իր սիրտն ազատ է, և հիմա փնտրում է իր սրտի ադամանդին:
Մարտի երազանքն է, որ իր հարազատները, ընկերները միշտ առողջ լինեն ու հետևեն իր կարիերայի զարգացմանը:
Operativ.am-ը ևս շնորհավորում է երգիչներին և մաղթում հաջողություններ: