ԲՀԿ-ն ընտրեց շոգեքարշի տարբերակը. Արմեն Բադալյան

-Ընդհանրապես աշխարհում երկու մոտեցում կա ցուցակներ կազմելու համար. առաջին մոտեցումն արեց ԲՀԿ-ն, երբ կուսակցության առավել հեղինակավոր մարդիկ գլխավորում են ցուցակը, երկրորդ տարբերակն այն է, որ ցուցակը գլխավորում է այն մարդը, ով մեծ ընտրազանգված ունի և կարող է ընտրվել, ԲՀԿ-ն ընտրեց շոգեքարշի տարբերակը. Օսկանյանը կուսակցության ամենահեղինակավոր անձանցից է և գլխավորում է ցուցակը,-Operativ.am-ի թղթակցի հետ զրույցում նման տեսակետ հայտնեց փորձագետ Արմեն Բադալյանը:

ԲՀԿ-ն կկարողանա՞ համախմբել ընդդիմադիր ընտրազանգվածին:

-Ընդդիմադիր ընտրազանգված հասկացություն չկա, ճիշտ է իշխանամետ փոքրիկ զանգված կա, սակայն ընդդիմադիր ընտրազանգված որպես այդպիսին չկա. ճիշտ կլինի ձևակերպել այսպես՝ նախագահական ընտրություններ կոչված ներկայացումից հետո մի դրական գործընթաց  կար, այն է՝ սոցիոլոգիական հարցումները ցույց տվեցին, որ Երևանում բավականին ուժեղ են իշխանությունների դեմ տրամադրված ընտրազանգվածի թվաքանակը, իսկ թե ԲՀԿ-ն կկարողանա այդ դժգոհ զանգվածին իր կողմը գրավել կախված է իր աշխատանքից, եթե նոռմալ ընտրարշավ անցկացնի՝ քարոզարշավ, ընտրական հանձնաժողովներում գրագետ անձանց ընդգրկելը, ֆինանսական ռեսուրսենրի ճիշտ կիրառումը, իրեն աջակցող լրատվական կայքերի ճիշտ աշխատանքը, եթե կարողանա այդ ամենը ճիշտ կազմակերպել, ապա բավականին լուրջ հաջողություններ կունենա:

Ըստ Ձեզ քաղաքական դաշտում ի՞նչ կեցվածքով հանդես կգա ԲՀԿ-ն, քանի որ ԲՀԿ-ն խորհրդարանական ընտրություններում հանդես եկավ որպես այլընտրանք:

-Չգիտեմ` որ կեցվածքը կընտրի, բայց առաջնահերթ պետք է հանդես գա հանուն Երևանի, եթե կարողանա ճիշտ ծրագիր կազմել, իհարկե առանց գերագնահատելու ծրագրի նշանակությունը, ամեն դեպքում ճիշտ աշխատանքի համար ամենևին էլ կարևոր չէ իշխանություն ես, ընդդիմություն, թե այլընտրանք: Կարևոր է նաև այն համագամանքը, թե ինչպես կկարողանա կանխել հանրապետականների ընտրակեղծիքները:

ԲՀԿ-ի շանսերը մե՞ծ են:

-Եթե նա գրագետ  աշխատի, ապա այո: Ի տարբերություն նախագահական ընտրությունների, որի արդյունքները կանխորոշված են, ավագանու ընտրությունների արդյունքները կանխորոշված չեն:

Ի՞նչ եք կարծում, եթե «Ժառանգությունն» ու ՀՅԴ-ն միասնական ցուցակով հանդես գան, ինչպիսի՞ն կլինի նրանց շանսերը:

-Միասնական ցուցակը հասկացությունը բլեֆ է, որովհետև տարբեր կուսակցություններ տարբեր ընտրազանգված ունեն, քաղաքականությունը մեխանիկական թվաբանություն չի, երբ երկու ընտրազանգված գումարեն և ընդհանուր թիվը ստանան: Պետք է բազմաթիվ ուսումնասիրություններ անել, մասնավորապես՝ ինչպես է «Ժառանգության» ընտրազանգվածը վերաբերվում ՀՅԴ-ին և հակառակը, արդյոք միավորման դեպքում նրանք կշահեն: Եվ հետո, եթե միասնական ցուցակով եք հանդես գալիս ընտրություններում, ապա և՛ հաղթանակի, և՛ պարտության դեպքում դուք լուրջ խնդիրների առջև եք հանգում: Պարտութայն դեպքում մեկը մյուսի վրա է գցում պարտությունը, իսկ հաղթանակի դեպքում խնդիր է առաջանում քաղաքապետ նշանակելու հարցում:

Պրն. Բադալյան, ոչ որպես փորձագետ, որպես ՀՀ քաղաքացի և երևանցի, ի՞նչ կասեք վերջին երկու տարիների ընթացքում՝ Տարոն Մարգարյանի պաշտոնավարման տարիներին Երևանում ավելի շատ բարեփոխումներ են եղել, թե՞ հետընթաց է գրանցվել:

-Ներկայիս քաղաքապետի գործունեությունը կգնահատեմ վատ. քաղաքում բազմաթիվ խնդիրներ կան՝ տրանսպորտը, կառուցապատման խնդիրներ կան, որոնք այդպես էլ չլուծվեցին, մեկ մետրի վրա տաս հարկանի շենք են կառուցում, կառուցված շենքերը որպես անշարժ գույք են մնում, ոչ թե որպես օգտագործելի տարածքներ, կանաչապատման խնդիրները լուծված չեն, համատիրություններն ինչ-որ անորոշ կառույցներ են, որ այդպես էլ չես հասկանում վճարված գումարը ուր է գնում, ինչ  է լինում. ես ոչ մի դրական բան չեմ տեսել, «աներձագին» էլ բրդելով տարան ԱԺ: