ՏԿԵ նախարարը հետևել է Մեծամոր–ՀԱԷԿ ավտոճանապարհի հիմնանորոգման աշխատանքներին

ՀՀ տարածքային կառավարման և ենթակառուցվածքների նախարար Գնել Սանոսյանն Արմավիրի մարզ կատարած այցի շրջանակներում հետևել է նաև Վաղարշապատ-Մեծամոր ճանապարհահատվածի շինարարական աշխատանքների ընթացքին, որի պայմանագրային արժեքը կազմել է 1 948 362 000 ՀՀ դրամ։ Այս մասին տեղեկացնում են ՏԿԵ նախարարությունից:

Նշված հատվածում աշխատանքներն ավարտված են։ Մյուս հատվածներում աշխատանքները նախատեսվում է սկսել մոտ ժամանակներս։

Նախարարը ծանոթացել է նաև Մեծամոր-ՀԱԷԿ հանրապետական նշանակության ավտոճանապարհի հիմնանորոգման աշխատանքներին։ Մեծամոր-ՀԱԷԿ ավտոճանապարհի հիմնանորոգման աշխատանքներն իրականացվում են ՀՀ պետական բյուջեի պետական նշանակության ավտոճանապարհների հիմնանորոգման ծրագրի շրջանակներում։ Պայմանագրային արժեքը կազմում է 1 149 900 000 ՀՀ դրամ։

Նշված հատվածում կատարվում են հողային աշխատանքներ, եզրաքարերի հիմքերի կառուցման և տեղադրման աշխատանքներ, մայթերի սալիկապատման, արհեստական կառուցվածքների նորոգման աշխատանքներ։ Ընդհանուր աշխատանքները նախատեսվում է ավարտել այս տարվա դեկտեմբերին:

Հաջորդ կանգառը Ակնալիճ-Զարթոնք-Արևիկ ավտոճանապարհն էր, որտեղ իրականացվում են հիմնանորոգման աշխատանքներ՝ կրկին ՀՀ պետական բյուջեի պետական նշանակության ավտոճանապարհների հիմնանորոգման ծրագրի շրջանակներում` 284 337 600 ՀՀ դրամ պայմանագրային արժեքով։

Աշխատանքների մեկնարկը տրվել է 2023 թ.։ Ներկայումս իրականացվում են կողնակների կառուցման և ճանապարհային պատվածքի մակերեսային մշակման աշխատանքներ։ Աշխատանքները նախատեսվում է ավարտել այս տարվա հունիսին:

Նախարարը ծանոթացել է նաև Նորապատի ավտոճանապարհի հիմնանորոգման աշխատանքներին։ Ներկայումս իրականացվում են հողային պաստառի վերականգնման, մայթերի կառուցման և ջրահեռացման համակարգի կառուցման աշխատանքներ։ Ընդհանուր աշխատանքները նախատեսվում է ավարտել այս տարվա օգոստոսին: Ծրագրի պայմանագրային արժեքը կազմում է 440 100 000 ՀՀ դրամ։

Նախարար Սանոսյանը հանձնարարել է աշխատանքները կատարել սահմանված ժամկետներում և բարձր որակով։