Ու՞մ է ուզում ապտակ հասցնել Ստյոպա Սաֆարյանը

Operativ.am-ը զրուցեց «Ժառանգություն» խմբակցության նախկին պատգամավոր Ստյոպա Սաֆարյանի հետ այն հարցի շրջանակներում, որ Սահմանադրական դատարանը հունվարի 25-ին գրավոր ընթացակարգով քննության է առնելու ԱԺ-ի մեծամասնական ընտրակարգով թիվ 1 ընտրատարածքային ընտրական հանձնաժողովի դեկտեմբերի 7-ի որոշումը վիճարկելու գործը:

«Կարեղ եմ ասել, որ ես շատ քիչ դեպքերում եմ գոհ լինում իմ պատրաստած գործերից, դիմումներից, բայց Սահմանադրական դատարան ես ներկայացել եմ գրեթե անթերի, անզիճելի, ապացուցելով, որ ընտրությունները չեն եղել ազատ և արդար, ընտրողի կամքը ազատորեն  չի ձևավորվել, մրացակիցների միջև հավասարություն չի ապահովվել, պետությունը, իսկ ավելի ստույգ՝ Երևանի քաղաքապետը, իր բոլոր ռեսուրսները օգտագործել է իր ազգականի ընտրության համար:

Իմ շատ ընտրողներ տեսնելով այդ անհավասարությունը, պարզապես չեկան ընտրության, որովհետև արդեն իսկ համարում էին պարտված ընտրություններ:

Այս կտրվածքով ես գտնում եմ, որ որևէ նոռմալ երկրի դատարանում ես կշահեի այս գործը»,-նշեց Սաֆարյանը:

Այն հարցին՝ հնարավո՞ր է քաղաքապետ Տարոն Մարգարյանը ազդեցություն ունենա դատարանի որոշման գործում, զրուցակիցս բացառեց, նշելով.

«Քաղաքապետը շատ փոքր մարդ է այս երկրում, նա ընդամենը կամակատար է: Չեմ կարծում՝ այն իրավիճակը, որ դրսևորվել է ընտրություններից հետո, հաճելի է իրեն, քանի որ ամբողջ ինտելեկտուալ հասարակությունը հասկացավ, թե քաղաքապետի «բարի» ժպիտի հետևում ինչ է թաքնված, ուստի չեմ կարծում, որ նա կարողանա ազդեցություն ունենալ դատարանի որոշման գործում»:

Նախկին պատագամավորը նշեց, որ հաստատակամ տրամադրված է իր հայցը մերժելու դեպքում Եվրադատարան դիմել.

«Գոնե որպես քաղաքացի իմ պարտքն եմ համարոմ պայքարել այնքան ժամանակ, ինչքան հնարավոր է, քանի որ այդ պայքարը իմ երեխայի և իմ համաքաղաքացիների մեր երկրում մնալու մասին է. պիտի կարողանալ ապտակ հասցնել ալյանդակություններին»: