Հունաստանում ցույցեր են տեղի ունեցել գնացքների ողբերգական վթարից հետո

Հունաստանում բողոքի ակցիաներ են տեղի ունեցել այն բանից հետո, երբ ուղևորատար և բեռնատար գնացքների բախման հետևանքով երկրում 43 մարդ է զոհվել: Հունաստանի երկաթուղիների տեխնիկական սպասարկման համար պատասխանատու Hellenic Train ընկերության Աթենքի գրասենյակի առջև ցուցարարների և իրավապահների միջև բախումներ են տեղի ունեցել: Ցուցարարներին ցրելու համար արցունքաբեր գազ է կիրառվել: Այս մասին հաղորդում է «Արմենպրես»-ը՝ վկայակոչելով BBC-ին:

Ցույցեր են տեղի ունեցել նաև Սալոնիկում և Լարիսա քաղաքում, որի մերձակայքում էլ տեղի էր ունեցել վթարը:

Երկաթուղային արհմիությունների անդամները հավատացած են, որ անվտանգության համակարգերն, ինչպես հարկն է, չեն աշխատում, և նշում են, որ տարիների ընթացքում դրա վերաբերյալ բազմաթիվ նախազգուշացումներ են եղել: Երկաթգծային աշխատողները նաև հայտարարել էին մարտի 2-ին գործադուլ անցկացնելու մասին՝ նշելով, որ պետությունը տարիներ շարունակ անտեսել է երկաթուղիները: Հենց դա էլ, ըստ նրանց, հանգեցրել է վթարին:

Ողբերգությունից հետո հրաժարական է տվել Հունաստանի ենթակառուցվածքների և տրանսպորտի նախարարը՝ նշելով, որ «պատասխանատվություն կստանձնի 21-րդ դարին չհամապատախանող երկաթգծային համակարգը նորոգելու գործում իշխանությունների երկարատև ձախողումների համար»:

Հիշեցնենք՝ Հունաստանի վարչապետ Կիրիակոս Միցոտակիսը նշել է, որ վթարը տեղի է ունեցել «հիմնականում մարդկային ողբերգական սխալի հետևանքով»: Դեպքի առնչությամբ ձերբակալվել է Լարիսա քաղաքի կայարանի հսկիչը: Նրան մեղադրանք է առաջադրվել անփութության հետևանքով սպանության հոդվածով: Աթենքից Սալոնիկ ուղևորվող գնացքում կար 350 ուղևոր, որոնք հիմնականում արձակուրդից վերադարձող ուսանողներ էին: