Նոր օրենքը հակասությունների պատճառ է դառնում՝ հակասելով Հայաստանի կողմից վավերացված մի շարք այլ օրենքների. Անաիդա Սիմոնյան

Այսօր լրագրողների հետ հանդիպման ժամանակ «Ժամանակավոր անաշխատունակության նպաստների մասին» ՀՀ օրենքում փոփոխություններ կատարելու օրինագիծի շուրջ իրենց մտահոգությունը հայտնեցին նաև «Ընդդեմ կանանց նկատմամբ բռնության» կոալիցիայի անդամները: Կոալիցիայի փաստաբան Անաիդա Սիմոնյանը նշեց, որ ներկայումս նախագիծը քննարկվում է ԱԺ-ում:

«Եթե գործող օրենքի համաձայն՝ մայրության նպաստը 100 % է տրվում, ապա 2016 թվականից, երբ նախագիծը կյանքի կոչվի նպաստի չափն էապես կնվազի»,-նշեց բանախոսը:

Վերջինս կանգ առավ օրենքի 16-րդ հոդվածի վրա, համաձայն որի՝ կնոջը նպաստ տրամադրելիս որպես աշխատանքային փորձ հաշվի է առնվում միայն տվյալ գործատուի մոտ աշխատած ժամանակահատվածը, հետևաբար նպաստը վճարվում է՝ համաձայն այդ ժամանակաշրջանի:

«Եթե կինը մեկ տարի է աշխատել, ապա նրան նպաստ է հասնում իր աշխատավարձի 40 %-ի չափով: Եթե նա աշխատել է մինչև 3 տարի, ապա նպաստը կազմում է աշխատավարձի 60 %-ը, իսկ 3 և ավելի տարի աշխատելու դեպքում այն կազմում է 80 %: Սա նաև սահմանափակում է կնոջ ազատ աշխատանքի իրավունքը»,-նկատեց բանախոսը:

Բանախոսը նշեց նաև, որ նոր օրենքը հակասությունների պատճառ է դառնում՝ հակասելով Հայաստանի կողմից վավերացված մի շարք այլ օրենքների, ինչպես օրինակ «Եվրոպական սոցիալական խարտիայի» 8-րդ հոդվածը, որով ամրագրված է, որ մայրության նպաստը չի կարող միջին աշխատավարձի 70 %-ից ցածր լինել:

Վարդուհի Ստեփանյան