Ուժը ժողովրդի մեջ է և ոչ ոք չի կարող ժողովրդին նեղացնել.Գագիկ Ծառուկյան (լուսանկարներ)
Այսօր Ազատության հրապարակում ելույթ ունեցավ նաև «ԲՀԿ» առաջնորդ Գագիկ Ծառուկյանը: Նա իր խոսքում ասաց, որ հաճախ ասում են, թե ինչու է Գագիկ Ծառուկյանն իր անցավ գլուխը դնում ցավի տակ, սակայն ի պատասխան դրա, պետք է ասել, որ պետք է լինի մեկը, ով կլուծի այդ խնդիրները:
«Մի մարդը չի կարող լավը լինել, սակայն այսօր, կարող եմ ասել, որ չկա մի բան, որ Ծառուկյանն ասած լինի և չանի: Ինչ-որ խոսք եմ տվել, ժամանակից շուտ արել եմ: Մարդիկ միշտ ասել են. Ծառուկյանը չի գնա կամ Ծառուկյանը չի անի, սակայն, ես երբեք իմ ժողովրդին հուսախաբ չեմ արել և խոստումներս ժամանակից շուտ կատարել եմ: Այսօր հաղթանակը մերն է, ձերն է: Ցանկացած պարագայում որոշողը ժողովուրդն է: Այսօր հազարավոր մարդիկ այստեղ են, հարյուր հազարավորներն էլ հեռուստացույցով կամ համացանցով են հետևում մեզ: Կան նաև մարդիկ, ովքեր այսօր մեզ հետ չեն, սակայն վաղը կլինեն, քանի որ հարցը ո՛չ Գագիկ Ծառուկյանինն է, ո՛չ Րաֆֆի Հովհաննիսայնինը, ո՛չ Լևոն Տեր-Պետրոսյանինը. հարցը ժողովրդինն է: Այսօր ժողովուրդը ծանրագույն վիճակում է: Յուրաքանչյուր ամսվա ավարտին ժողովուրդը մտածում է պարտքը փակի, հարկը տա, տույժ-տուգանքները տա և բանկի տոկոսները փակի: Այսքանից հետո նրանք դժվարությամբ են ապրում, սակայն անհրաժեշտ է հարմարավետ պայմաններ ստեղծել մարդկանց համար: Բոլորն էլ ուզում են լավ ապրել, բայց նորմալ մարդիկ պետք է միասնական լինեն, քանի որ ուժը ժողովրդի մեջ է»,-իր ելույթում ասաց Գագիկ Ծառուկյանը:
Վերջում, «ԲՀԿ» առաջնորդը նաև ասաց, որ ուժը ժողովրդի մեջ է և ոչ ոք չի կարող ժողովրդին նեղացնել: