Ով ինչ ուզում է, թող ասի՝ Լևոն կամ մեկ այլ անուն, մեզ միացնողը մեկ անուն է՝ Հայաստան. Րաֆֆի Հովհաննիսյան (լուսանկարներ)

Ազատության հրապարակում ելույթ ունեցավ նաև «Ժառանգություն» կուսակցության ղեկավար Րաֆֆի Հովհաննիսյանը: «Այսօր՝ հոկտեմբերի 24-ին, Մեծ եղեռնի 100-ամյակից 6 ամիս առաջ մենք հավաքվել ենք այստեղ, և սա ձեր պահանջն է: Եթե այս հարթակում տարաձայնություններ լինեն, դուք պիտի պահանջեք, որ մենք միասին լինենք»,- ասաց «Ժառանգություն» կուսակցության առաջնորդ Րաֆֆի Հովհաննիսյանը:

Նա նշեց, որ իրենք այսօր հավաքվել են որպես հայ մարդիկ ու ՀՀ քաղաքացիներ:

«Ով ինչ ուզում է, թող ասի՝ Լևոն կամ մեկ այլ անուն, սակայն մեզ միացնողը մեկ անուն է՝ Հայաստանը: Իսկ ամենակարևորն այն է, որ դուք եք այստեղ, այլ ոչ թե մենք ՝ առաջնորդներ»,- ասաց Հովհաննիսյանն ու հավելեց, որ հայ հասարակությանը պետք է հեղափոխություն՝ հոգու, մտքի, ազգի, քաղաքացու:

Րաֆֆի Հովհաննսիյանը նաև ասաց, որ այդ հեղափոխությունը լինելու է սահմանադրական ու իրավական: «Ես հարգում եմ Լևոն Տեր-Պետրոսյանի տեսակետը, և եթե անգամ ես նրա հետ համաձայն չեմ, միևնույն է ես հարգում եմ:
Դուք գիտեք մեր տեսակետը: Ես չեմ խորացնի, ուղղակի կրկնեմ, որ մենք դեմ ենք Հայաստան-Թուրքիա արձանագրություններին, մենք դեմ ենք նաև Եվրասիական տնտեսական միությանը Հայաստանի անդամակցությանը: Սա հակառուսականության կոչ չէ և չի խանգարում մեր միասնական իշխանափոխության պահանջին: Մինչև Հայաստանը միանա որևէ միության, ես համաձայն չեմ, որ այն անշրջելի է, Հայաստանը պիտի մնա Արցախի ինքնիշխանությունը ճանաչած:
Չնայած մեր անցած տարաձայնություններին՝ մենք կոչ ենք անում քաղաքական և քաղաքացիական բոլոր ուժերին մեր երկիրը փրկելու և սահմանադրական կարգը պահելու համար»,-ասաց Րաֆֆի Հովհաննիսյանը: