Սեպտեմբերի 21-ին մինչ մայրաքաղաքում ցնծություն էր, գյուղացին «սգում» էր. (լուսանկար)

Սեպտեմբերի 21-ին, մինչ  մայրաքաղաքում   մեծ շուքով նշվում էր ՀՀ Անկախության 23-րդ տարեդարձը, գյուղացին կրկին տխրելու ու հիասթափվելու լուրջ առիթ ունեցավ:

Լոռու մարզի Լեջան գյուղում տեղացած ուժեղ ու խոշոր կարկուտը իսկական «նվեր»  է դարձել  գյուղացու համար:

Կարկուտից տուժել են բնակիչների այգիները, բանջարեղենի բոստանները, անգամ դաշտում կապված հորթն է խեղդվել:

Operativ.am-ի թղթակիցը կապ հաստատեց գյուղի բնակիչների հետ, ովքեր անգամ այդ թեմայով խոսելու«սիրտ» չունեին:

Բնակիչներից գրեթե  բոլորը հազիվ էին զսպում արցունքերը: Նրանց բոլորի աշխատանքը զրոյի էր հավասարվել մեկ րոպեում:

«Կես ժամ խոշոր կարկուտ է տեղացել, դե պատկերացրեք, թե ինչ է կատարվել հողատարածքներում: Ամեն ինչ հողին է հավասարվել»,-զայրացած կիսվեց տիկին Լաուրան:

«Գոնե մեր սեփական հողից քաղում ու թարմ բանջարեղենից էինք օգտվում.լոլիկ, վարունգ, բիբար, կանաչի»,-ասաց թոշակառու կինը:

Այն հարցին, թե արդյոք մյուս տարի կրկին հող կմշակեն, Լամարան, ում այգին բնակիչների վկայությամբ ամեն տարի  նախանձելի է լինում, պատասխանել է. 

«Գյուղացին սովոր է: Ինչպես ասում են` կարկուտը ծեծած տեղն է ծեծում: Բա ինչ պիտի անենք, գյուղացին, որ հող չմշակի` ինչպես ապրի: Ճիշտ է հիասթափվում ենք տարեցտարի, քանի որ  ամբողջ սեզոնին արևին, անձրևին աշխատում ենք, հող փխրեցնում, ջրում,  հատիկ-հատիկ հանում մոլախոտերն ու ինչ` ձվից մեծ կարկուտը մեկ րոպեում սրփում տանում է»:

Բնակիչներից մեկն էլ բողոքում էր, որ չնայած երկու հակակարկտային կայան կա տեղադրված,  բայց   նրանցից ոչ մեկը  գործի չի դրվել:

Լեջան գյուղում  երեկոյան ժամին 40 րոպե տեղացած կարկուտն անգամ առավոտյան դեռ հալված չի եղել:

:

«Երեխաներն արդեն պատրաստվում էին սահնակ քշել»,- կես ծիծաղ, կես լուրջ` ավելացրեց բնակչուհին:

Կարինե Գևորգյան