Ինչո՞վ է Հայաստանը գրավում զբոսաշրջիկներին

Ամեն տարի բազմաթիվ զբոսաշրջիկներ են այցելում Հայաստան, մինչդեռ նրանցից ոչ բոլորն են նախընտրում կանգ առնել թանկարժեք հյուրանոցներում: Կան զբոսաշրջիկներ, որոնք հաճույքով իրենց հանգիստը կազմակերպում են մարզերում: Այս տեսանկյունից հատկապես աչքի են ընկնում Դիլիջանն ու Գորիսը, իսկ Մարտունին, գտնվելով երկու զբոսաշրջային քաղաքների միջև, բաց չի թողում հնարավորությունը զբոսաշրջիկներին տարածաշրջանին ծանոթացնելու համար:

Այստեղ զբոսաշրջությունը զարգացնելու մտադրությամբ մի քանի անհատներ փորձում են զբոսաշրջիկներին ծանոթացնել շրջանի գեղեցիկ տեսարաններին, հուշակոթողներին, կոլորիտին, նիստ ու կացին: Մարտունիում  ի տարբերություն մնացած զբոսաշրջային քաղաքների՝ դեռևս չկան հյուրատներ, փոխարենը զբոսաշրջիկներին հյուրընկալում են տեղի բնակիչները: Ներկայումս այստեղ առաջնային խնդիրը հյուրատներ կառուցելն է:

Մարտունիում զբոսաշրջիկներին հյուընկալող անհատները կապ ունեն նաև Հայաստանի այլ հյուրատների հետ, որոնք տեղանքը տեսնել ցանկացող զբոսաշրջիկներին ուղարկում են Մարտունի: Պարզելու համար, թե որտեղ են կանգ առնում ակտիվ հանգիստ նախընտրող զբոսաշրջիկները և ինչպես է կազմակերպվում նրանց հանգիստը մարզում, Operativ.am-ի թղթակիցը զրուցեց Մարտունիում զբոսաշրջիկների հանգիստը կազմակերպող անհատ Լիանայի հետ:

Եվրոպացի երիտասարդները նախընտրում են հանգստի առավել մատչելի և հարմար տարբերակը՝ շրջագայել “Auto Stop”–ով, հաճախ գերադասելով գիշերել քնապարկերում և վրաններում:

«Մեզ մոտ գալիս են նաև հեծանվորդներ Արևելյան եվրոպայից, որոնց ուղարկում են տեղի տուր գործակալություններից: Մենք այստեղ նրանց դիմավորում ենք և կազմակերպում ենք 15-օրյա հանգիստ, որի ընթացքում կազմակերպում ենք էքսկուրսիաներ Դիլիջանով, Ճամբարակով, Մարտունիով, Եղեգնաձորով, Սիսիանով և Գորիսով: Մենք զբոսաշրջիկների համար այց են կազմակերպում նաև դեպի Արցախ՝ Շուշի, Գանձասար և Դադիվանք: Նշեմ, որ էքսկուրսիաների համար մենք չենք ընտրում հեշտ ճանապարհներ, այլ ընտրում ենք ամենաանբարեկարգ ու դժվարանցանելի ճանապարհները, քանի որ հեծանվորդ զբոսաշրջիկները ոչ այդքան պատմամշակութային կոթողներով են հետաքրքրված, որքան ակտիվ հանգստով: Նրանց համար դժվարանցանելի ճանապարհներ հաղթահարելն ավելի գրավիչ է»,-նշեց զրուցակիցս:

Ինչ վերաբերում է պատմամշակութային վայրերին, ապա զրուցակիցս ընդգծեց, որ մարզերի պատմամշակութային վայրերի մասին տուր գրքերում տեղեկություններ չկան, ուստի ակտիվ էքսկուրսիաներին զուգահեռ կազմակերպվում են նաև տուրեր տեսարժան վայրերում:

«Մենք ցույց տալու շատ բան ունենք: Մենք առաջարկում ենք նաև ագրոտուրիզմ, բացի այդ զբոսաշրջիկներին գրավում են մեր տնական ու միայն օրգանիկ մթերքները: Այստեղ կանգ առնելու պայմանները բավականին հարմարավետ են, քանի որ մենք առաջարկում ենք զբոսաշրջիկներին տուն, սնունդ, տեսարժան վայրեր ու ամենակարևորն այնպիսի կոլորիտ, որ ուրիշ տեղ նրանք չեն ստանա»,-ընդգծեց Լիանան:

Ինչ վերաբերում է Մարտունու տեսարժան վայրերին, ապա դրանք բազմաթիվ են, մինչդեռ զբոսաշրջիկներին ներկայացվող տարածքներից Լիանան առանձնացնում է հետևյալները. Մարտունիում միջին դարերից պահպանված հնագույն կոթողներ և եկեղեցիներ, որոնք պատկանել են Սյունիքի իշխանությանը, Մարտունու շրջանի Ձորագյուղում գտնվող Աշոտ Երկաթի քրոջ՝ Մարիամի գերեզման-դամբարանը և նրա նրա ցանկությամբ կառուցված 9–րդ դարի Շողագավանքը:

Հ.Գ.Ինչպես տեսնում ենք, մարզերում կազմակերպվող հանգիստը հրաշալի հնարավորություն է ընձեռում ներկայացնելու տարածաշրջանը: Նախ նման հետաքրքիր հանգիստը թույլ է տալիս ստանդարտ տուրերից բացի ակտիվ հանգիստ անցկացնել՝ բացահայտելով Հայաստանը նոր կողմերից: Նման հանգիստն անհամեմատ մատչելի է նաև ֆինանսական տեսանկյունից: Սա ձեռնտու է նաև տեղաբնակների համար, որոնց հնարավորություն է ընձեռվում ներկայացնել իրենց տարածաշրջանի տեսարժան վայրերն ու արժեքները և Հայաստանը դարձնել զբոսաշրջային առումով գրավիչ և ոչ ստանդարտ երկիր։

Վարդուհի Ստեփանյան