Հայաստանում հաշմանդամություն ունեցողների համար չկան համապատասխան աշխատավայրեր և տրանսպորտի հարմարավետություն
Մեզանում հաշմանդամություն ունեցողների համար կրթությունից ոչ պակաս կարևոր է նաև աշխատանքի հարցը: Բնական է, որ այն հաստատությունները, որոնցում պետք է աշխատեն հաշմանդամություն ունեցողները, պետք է հարմարեցված լինեն վերջիններիս համար:
Այսօր լրագրողների հետ հանդիպման ժամանակ «Սպառողների խորհրդատվության կենտրոն» ՀԿ նախագահ Կարեն Չիլինգարյանը և «Էխո» հաշմանդամների հարցերով զբաղվող ՀԿ նախագահ Սերյոժա Օհանջանյանը խոսեցին ոլորտում առկա խնդիրներից:
«Նախկին օրենքի համաձայն՝ հաշմանդամություն ունեցողին աշխատանքի վերցնելու համար գործատուն ոչ թե ազատվում էր հարկերից, այլ պետությունը փոխհատուցում էր միջին աշխատավարձի 50 %-ը և 200 հազար դրամ դրամադրում տարածքը հաշմանդամություն ունեցող աշխատակցին հարմարեցնելու համար, ինչի համար ներկայումս տրամադրվում է 500 հազար դրամ: Սա ավելի պետք է շահագրգռեր, մինչդեռ տեղաշարժ չկա»,-նշեց Սերյոժա Օհանջանյանը:
Բանախոսը շեշտեց, որ ներկայումս միակ կառույցը, որը հարմարեցված է հաշմանադամություն ունեցողների համար ԱԻՆ-ն է, որտեղ աշխատում է հաշմանդամություն ունեցող 30 մարդ:
Հաջորդ խնդիրը հաշմանդամություն ունեցողների տեղաշարժի խնդիրն է: Ըստ Կարեն Չիլինգարյանի՝ մեզանում տրանսպորտն առհասարակ հարմարեցված չէ հաշմանդամություն ունեցողների համար:
«Անցած տարի Քիշնևում էի և տեսա, որ բոլոր տրոլեյբուսները թեքհարթակներ ունեին: Մարդիկ սեղմում էին համապատասխան կոճակը և բարձրանում: Իսկ մեզ մոտ ընդհամենը մեկ տրոլեյբուս կա, որին պետք է երկար ժամանակ սպասել, էլ չեմ ասում բարձրանալու մասին, որը ժամանակատար է»,-եզրափակեց Կարեն Չիլինգարյանը:
Վարդուհի Ստեփանյան