Կրակոցները դադարել էին նախագահների հանդիպումից 5 օր առաջ
«Հրապարակ» թերթը գրում է. «Օգոստոսի 18-20-ը մի խումբ լրագրողներով գտնվում էինք Լեռնային Ղարաբաղի Հանրապետությունում, նախ այցելեցինք պաշտպանական դիրքեր ու ՊԲ զորամասեր, ապա հանդիպում ունեցանք ԼՂՀ ՊԲ հրամանատար Մովսես Հակոբյանի հետ։ Նա մոտ երկու ժամանոց ասուլիս տվեց՝ պատասխանելով հայաստանյան լրագրողների հարցերին։
Մովսես Հակոբյանի խոսքը, հատկապես վերջին իրադարձություններից հետո, առավել քան հուզական էր, սակայն բանակն այն կառույցն է, և պատերազմն այն թեման է, որտեղ էմոցիաներին տուրք տալը ամենաանարդյունավետ գործն է։ Մի կողմ թողնելով ԼՂՀ ՊԲ ղեկավարի էմոցիոնալ զեղումներն ու հայ զինվորի ոգով ու արիությամբ հպարտանալու ձգտումները՝ անցնենք բուն ասելիքին։
ԼՂՀ ՊԲ հրամանատարը, հակառակորդի գործողություններին տարբեր գնահատականներ ու որակումներ տալուց հետո, նախ ներկայացրեց, թե ինչ են արել իրենք ու ինչ են ամեն օր անում այս դեպքերից թե՛ առաջ, թե՛ հետո մեր բանակում, ինչպես է իրականացվում բանակի հզորացման ու զարգացման գործընթացը։
«Ես ամեն օր սպասում եմ պատերազմի,-ասաց Մ. Հակոբյանը։- Բանակի ամենօրյա գործունեությունն ուղղված է պատերազմին պատրաստվելուն: Այսօրվա պարապմունքները, եթե դուք նկատել եք, նպատակն է, թե պատերազմի դեպքում ամեն անձ ինչ պետք է անի: Մենք ճշտում ենք մեր զինվորների մարտական հաշվարկները:
Կուտակումները, որ իրականացրել է Ադրբեջանը, որոշակի միջոցառումներ նաև մենք ենք իրականացրել այդ ուղղությամբ, հրետանային մի քանի ստորաբաժանում ենք հանել կրակային դիրքի, նաև հակատանկային ստորաբաժանումներ ենք հանել կրակային դիրքեր, տանկային ստորաբաժանումներ ենք հանել առաջին գիծ»,-ասաց նա՝ հավելելով, որ Ադրբեջանն այս ընթացքում փորձել է մեզ շանտաժի ենթարկել, սակայն այդ շանտաժը շատ կարճ է տևել, նրանք արդեն ամսի 5-ից հետ են քաշել բոլոր ստորաբաժանումները, որոնք առաջին գիծ էին բերել:
Ըստ Հակոբյանի՝ հակառակորդի կողմից կրակոցները նվազել են այն պատճառով, որ նրանք հասկացել են, թե ինչ արժեք ունեն իրենց կրակոցները, մեր պատասխաններն ու արժանի հակահարվածներն են նրանց ստիպել դադարեցնել արկածախնդիր գործողությունները մեր դիրքերի ուղղությամբ: Այս դեպքում հարց է առաջանում՝ ինչի՞ համար էր նախագահների հանդիպումը Սոչիում, ու ինչո՞ւ էր հասարակությունն ակնկալում, որ հենց այդ հանդիպման արդյունքում է խաղաղություն վերահաստատվելու։
Առհասարակ, որքանո՞վ նպաստեց նախագահների հանդիպումն այս հարաբերական խաղաղության հաստատմանը։ Մանավանդ, դատելով Հակոբյանի խոսքից, խաղաղությունը հաստատվել էր հանդիպումից մոտ 5 օր առաջ՝ օգոստոսի 5-ին:
Մեր այս հարցին նախարար Հակոբյանն այսպես պատասխանեց. «Ցանկացած պատերազմի ավարտը բանակցություններն են: Աշխարհում դեռ չի եղել պատերազմ, որ չավարտվի բանակցություններով: Եվ ցանկացած բանակցություն ցանկացած մակարդակով պաշտպանության բանակի համար ողջունելի է:
Եվ այս վերջին հանդիպումը ևս մեզ համար ողջունելի է, հատկապես, երբ այն եղավ սահմանային լարվածություններից հետո: Թե ինչ ազդեցություն կունենա, կարծում եմ՝ պետք է սպասենք: Առանձնապես մեծ ակնկալիքներ չունեմ, որովհետև ես չեմ տեսնում, որ Ադրբեջանի իշխանությունը պատրաստ է Լեռնային Ղարաբաղի հիմնախնդիրը լուծել խաղաղ ճանապարհով: Թե ինչ ազդեցություն կունենա նախագահների վերջին հանդիպումը, պետք է սպասել, սակայն սպասել, թե վաղը կամ մյուս օրը, կամ մյուս տարի մենք այդ ազդեցությունը կզգանք, ես այդպիսի սպասելիքներ չունեմ»:
Մովսես Հակոբյանն անդրադարձավ նաև ԵԱՀԿ Մինսկի խմբի գործունեությանը՝ ասելով, որ այն բարձր է գնահատում, քանի որ այդ խմբի գործունեությունն ուղղված է տարածաշրջանում կայուն խաղաղության հաստատմանը: Սակայն չէ որ միջազգային կառույցները, նաև ԵԱՀԿ Մինկի խումբը, շարունակում են չեզոք դիրք գրավել ու որևէ գնահատական չհնչեցնել Ադրբեջանի գործողությունների վերաբերյալ, ԼՂՀ ՊԲ հրամանատարն ասաց, որ Մինսկի խմբի համանախագահող երկրները գնահատական տալու մանդատ չունեն:
«Մենք առաջարկել ենք, որպեսզի Մինսկի խմբի շրջանակներում հանձնաժողով ստեղծվի, որը գնահատական կտա և կհետաքննի միջադեպերը, սակայն Ադրբեջանը հրաժարվել է դրանից, իսկ Մինսկի խումբն այս պահին ուղղակի իրենց երկրների ղեկավարներին ներկայացնում է իրավիճակը»,-ասաց նա։ Ինչ վերաբերում է շփման գծում խաղաղապահների տեղակայմանը, Հակոբյանն ասաց, որ խաղաղապահների տեղակայման կարիք Լեռնային Ղարաբաղում չկա, քանի որ ամենալավ խաղաղապահը ԼՂՀ պաշտպանության բանակն է:
Ինչ վերաբերում է ՀՀ նախագահի այն հայտարարությանը, թե մենք բալիստիկ հրթիռներ ունենք, որոնցով կարող ենք ադրբեջանական ցանկացած ծաղկուն բնակավայր վերածել Աղդամի ավերակների, ՊԲ հրամանատարն ասաց, որ մենք նոր չենք ձեռք բերել այդ հրթիռները, վաղուց ունեինք, որոնք նախկինում եղել են միջուկային հրթիռներ, հիմա մարտագլուխները փոխված են, և դրված են հասարակ մարտագլուխներ, սակայն դրանք շատ դիպուկ հրթիռներ են՝ 300 կմ շառավիղ ունեցող: Նախարարից հետաքրքրվեցինք, թե ինչ կասի ադրբեջանական բանակի՝ Ռուսաստանից գնած «Սմերչի» մասին և, առհասարակ, ինչպես է վերաբերվում այն հանգամանքին, որ մեր դաշնակից Ռուսաստանը զինում է մեր հակառակորդին։ Այստեղ Մովսես Հակոբյանը խոստովանեց, որ իր համար այնքան էլ հաճելի չէ այդ փաստը»։
Առավել մանրամասն՝ «Հրապարակ» թերթի այսօրվա համարում: