Ուշացրած, բայց ոչ ուշացած նախաձեռնություն

«Ժողովուրդ» թերթը գրում է. ««Ժողովուրդ»-ը տեղեկացավ, որ նախօրեին ԱԺ նախագահ Գալուստ Սահակյանն իր աշխատասենյակում հանդիպում է ունեցել ԱԺ խմբակցությունների ղեկավարների հետ: Հանդիպմանը մասնակցել են ԲՀԿ-ից Նաիրա Զոհրաբյանը, «Ժառանգություն»-ից՝ Ռուբեն Հակոբյանը, ՀՅԴ-ից՝ Արմեն Ռուստամյանը, ՀՀԿ-ից՝ Վահրամ Բաղդասարյանը: Տեղեկացանք, որ խորհրդարանական 6 ուժերը որոշել են համատեղ նախագիծ մշակել սահմանամերձ գյուղերին արտոնություններ տալու մասին:

Թեև ՀԱԿ-ն ու ՕԵԿ-ը ներկա չեն եղել հանդիպմանը, այնուամենայնիվ նրանք ևս պատրաստակամություն են հայտնել՝ միանալու նախաձեռնությանը: Ավելին՝ ՀԱԿ ղեկավար Լևոն Զուրաբյանն ասաց, թե ինքը մասնակցել է հանդիպմանը: Նշենք, որ նման նախագծով արդեն հանդես են եկել նաև ՀՀ կառավարությունն ու ԱԺ պատգամավոր Նիկոլ Փաշինյանը: Անշուշտ, լավ ու, կարելի է ասել, մի փոքր էլ ուշացած նախաձեռնություն է:

Ի վերջո, որևէ մեկի համար բացահայտում չէր, թե ինչ վիճակում են գտնվում մեր երկրի սահմանամերձ համայնքները: Սակայն մինչ օրս որևէ պաշտոնյա, որևէ պատգամավոր հարկ չէր համարում զբաղվել այդ խնդրով: Ինչ է, պիտի Ադրբեջանը դիվերսիաներ կազմակերպեր, սահմանում իրավիճակը լարվեր, որ գործող իշխանությունն ու խորհրդարանական ուժերը գյուղեր այցելեին ու որոշեին արտոնությունների հարցը բարձրացնե՞լ: Համաձայնեք՝ այս իրավիճակից փոքր-ինչ պոպուլիզմի հոտ է գալիս: Ցավոք»:

Առավել մանրամասն՝ «Ժողովուրդ» թերթի այսօրվա համարում: