Սահմանամերձ գյուղերի բնակիչների կրած վնասի մի մասն են փոխհատուցել

«Հրապարակ» թերթը գրում է. «Հուլիսի վերջին ղարաբաղաադրբեջանական շփման գծում լարվածությունը, հակառակորդի կողմից սահմանամերձ գյուղերի գնդակոծումը շարժել էին կառավարության գութը, և արդեն օգոստոսի 8-ին, կառավարության որոշմամբ, պարբերաբար տեղի ունեցած գնդակոծության հետևանքով բնակելի տներին հասցված վնասը մասնակի փոխհատուցելու նպատակով, Տավուշի մարզպետարանին հատկացրին 20 մլն դրամ: Մինչ այդ անտարբերության մատնված գյուղացիների համար մասնակի փոխհատուցումն էլ սփոփիչ էր:

Երեկ Այգեպարի գյուղապետից հետաքրքրվեցինք, թե ինչ սկզբունքով է բաշխվել այդ մասնակի փոխհատուցումը: Սակայն պարզվեց՝ դեռ հաշվարկներ են անում, քանի որ կրակոցները դադարել են օգոստոսի 9-ից: «Այս պահին հաշվարկ ենք անում, չափում վնասը, տեսնենք՝ ինչքան է ընդհանուրը, նոր ներկայացնենք հանձնաժողովին»,-մեզ հետ զրույցում ասաց Այգեպարի գյուղապետ Անդրանիկ Այդինյանը:

Հարցին, թե գյուղացին ինչպես պետք է վերականգնի վնասը, եթե կառավարությունն ընդամենը մասնակի է փոխհատուցել, Այդինյանը դժվարացավ ասել, քանի դեռ չկա վերջնահաշվարկ. «Հլը չենք վերջացրել, հիմի գործով ենք զբաղվում, երբ ներկայացնենք հանձնաժողովին, իրենք էլ մի բան ասեն, նոր կարող ենք ասել, դեռ մի քանի օր կտևի»: Նշենք, որ Այգեպարում 630 տնտեսություն կա: Գյուղապետը վստահեցրեց, որ վերջին շրջանի կրակոցներից հետո գյուղացիները չեն արտագաղթել, հեռացել էին մյուս գյուղեր և հիմա վերադառնում են»:

Առավել մանրամասն՝ «Հրապարակ» թերթի այսօրվա համարում: