Վստահ եմ, որ մեր ընդդիմությունը ժամանակի ընթացքում համախմբվելու է մեզ հետ

«Հրապարակ» թերթը գրում է. «Պատերազմի վտանգի թուլացմանը զուգահեռ, արդեն իսկ ակտիվացել են աշունը թեժ դարձնելու մասին ոչ իշխանականների հայտարարությունները, որոնցով, ամենայն հավանականությամբ, փորձում են իշխանություններին հետ բերել սահմաններից ու նրանց ուշադրությունը սևեռել իրենց 12 կետանոց պահանջագրի վրա:

Հիշեցնենք, որ դրա չկատարման դեպքում վերջնաժամկետ են սահմանել և հոկտեմբերի սկզբին իշխանությունների հրաժարականի պահանջով հանրահավաքների շարք են սկսելու: Մինչդեռ իշխանության ներկայացուցիչները մտահոգված չեն ոչ իշխանականների զգուշացումներից:

«Ընդդիմություն է, այլ բան չէր էլ կարող անել»,- մեզ հետ զրույցում նշեց ՀՀԿ խմբակցության պատգամավոր, ԱԺ պետաիրավական հանձնաժողովի ղեկավար Հովհաննես Սահակյանը:
- Այնուամենայնիվ, ի՞նչն է խանգարում ընդառաջ գնալ քառյակի պահանջներին, հատկապես, որ ի սկզբանե՝ պահանջների հրապարակման օրը, ՀՀԿ-ական պատգամավորներից շատերը ցնծության մեջ էին, քանի որ դրանցից շատերն ընդգրկված են կառավարության ծրագրում, ասել է թե՝ ընդդիմադիրների ուզածը մեծ բան չէ:

- 12 կետերի մասին մենք բազմիցս ենք խոսել և այսօր էլ նույն դիրքորոշումն ենք հայտնում, կարծում եմ՝ և մեր դիրքորոշման մեջ, և իրենց դիրքորոշման մեջ որևէ բան չի փոխվել, ավելացնելու բան չունենք:

- Այսի՞նքն:
- Այսինքն՝ այդ կետերի մի մասն ընդգրկված է կառավարության ծրագրում, և, հետևաբար, այդ ոչ իշխանականների մի մասն ընդամենը ընդդիմադիր երևալու խնդիր է լուծում, այսինքն՝ մի մասն էլ շատ կարևոր է, և շատ ուրախ ենք, որ ընդդիմադիրները կարողանում են կառավարության առջև խնդիր դնել:

- Կառավարությունը, սակայն, չի կատարում իր առջև ընդդիմության կողմից դրված խնդիրները, իսկ նրանք հայտարարում են, որ հետևողական են լինելու իրենց պահանջներին և վերջնարդյունք չունենալու ժամանակ իշխանությունների հրաժարականի պահանջ են բարձրացնելու ու դրան հասնելու են լայն զանգվածների կոնսոլիդացման՝ հանրահավաքներ հրավիրելու ճանապարհով:

- Դա իրենց խնդիրն է, իրենք իրենց ռազմավարությունն ու մարտավարությունն ունեն, մենք՝ մեր: Ես հասկանում եմ, որ մեկ անգամ հետաձգած իրենց հանրահավաքի համար պետք է որոշակի հող նախապատրաստվի, աուրա, տպավորություն, կարծիք, որպեսզի կարողանան այդ հանրահավաքը կազմակերպել, և այն հուժկու հանրահավաքը, ինչի մասին խոսում էին, իրականություն դարձնեին: Հասկանում ենք՝ ընդդիմադիր են, պետք է խոսեն, ասեն, որևէ խնդիր չկա, բայց որոշ ընդդիմադիրների խորհուրդ կտամ այդ կոմպլեքսներից ազատվել: Իշխանությունը խնդիր չի տեսնում և լավ ծրագրերի շուրջ համագործակցում է:

- Ինչո՞ւ եք այդքան վստահ, որ ոչ իշխանականներն այս անգամ էլ միայն խոսքով կբավարարվեն և իրականություն չեն դարձնի իշխանափոխության մասին իրենց հայտարարությունները, ի վերջո, գնալով վիճակը վատանում է ավելի:
- Ես ընդամենը ասացի, որ ընդդիմադիր լինելը ենթադրում է որոշակի տոնայնություն, հայտարարություն, որ այսպես ենք անելու, այնպես ենք անելու, որը տեղավորվում է դասական քաղաքականության ընդդիմադիր հատվածի մեջ, մնացածն արդեն տեխնիկայի խնդիր է, եթե կկարողանան իրականացնել կամ իսկապես խնդիրները բարձրացնել, որ իրականում գոյություն ունեն, շատ ավելի լավ կլինի»:

Առավել մանրամասն՝ «Հրապարակ» թերթի այսօրվա համարում: