Ամեն տարի զոհեր ենք ունենում
«Ժողովուրդ» թերթը գրում է. «Չնայած բազմաթիվ նախազգուշացումներին, հայտարարություններին, որ անհրաժեշտ է խուսափել անծանոթ ջրանցքներում լողալուց կամ պետք չէ հատել Սևանա լճում առկա կարմիր գծանշումներով գնդակները, այնուամենայնիվ, մեր շատ հայրենակիցներ, չդիմանալով գայթակղությանը, կամ առավել ինքնավստահություն ցուցաբերելով, դժբախտ պատահարի զոհ են դառնում:
Ըստ ՀՀ Ազգային վիճակագրական ծառայության տվյալների՝ այս տարվա հունվար-հունիս ամիսների ընթացքում հանրապետությունում Արտակարգ իրավիճակների նախարարության աշխատակիցների կողմից իրականացրած գործողությունների ընթացքում արհեստական և բնական ծագման ջրային ավազաններում ջրահեղձվել է 5 մարդ, իսկ 2-ը՝ վիավորվել: Իհարկե այս թիվը փոքր է՝ համեմատած նախորդ տարվան, քանի որ 2013թ. նույն ժամանակահատվածում մահացել էր 13-ը, վիրավորվել' 4-ը: Բայց նույնիսկ այս ցուցանիշները ոգեւորիչ չեն, քանի որ, ի վերջո, ամեն տարի զոհեր ենք ունենում, որից, անշուշտ, կարելի է խուսափել:
Սակայն մեր հայրենակիցները շարունակում են տրվել կովկասյան տաքարյունությանը և չեն հետեւում ջրում լողալու ամենատարրական կանոններին, այն է՝ հարբած չի կարելի ջուրը մտնել, և երկրորդ՝ եթե պրոֆեսիոնալ լողորդ չես, ուրեմն բացարձակապես պետք չէ լողալ շատ հեռու:
Օգոստոսի 16-ին Արմավիրի մարզի Արգինա համայնքից դեպի Քարակերտ գյուղ հոսող ջրանցքում հայտնաբերվել էր Քարակերտ գյուղի 22-ամյա բնակիչ Ռուդիկի դին: Ըստ Քարակերտ համայնքի ղեկավար Մհեր Հարթենյանի, Ռուդիկը աշխատում էր ՀՀ ոստիկանության ներքին զորքերում: Գյուղապետի պատմելով, տղային փորձել են օգնություն ցուցաբերել, սակայն չեն կարողացել փրկել.
«Չեմ կարող ասել քեֆի են եղել, թե ոչ, բայց այդ տղան ընկերների հետ է եղել ու ընկերները՝ նկատելով, որ Ռուդիկը խեղդվում է, շտապ զանգահարել են ինձ: Այդ ջրանցքը վտանգավոր տեղ է ու ամեն տարի մի դեպք լինում է: Անցած տարին էլ մի հոգի խեղդվեց: Այդ երկար գետի վրա չենք կարող ցանկապատ դնել: Միայն զգուշացնում ենք, որ մարդիկ չգնան: Բայց մեկ է՝ գնում են ու այսպիսի դեպք է լինում: Շատ խելոք տղա էր, մի քանի ամիս էր, ինչ բանակից եկել էր»:
Գյուղապետի պատմելով, տղայի ընտանիքը տուժած ընտանիք է, քանի որ նրանց գերդաստանում սա միակ դժբախտությունը չէ, որ եղել է.
«Երկու տարի առաջ Ռուդիկի մորաքրոջ որդին Սասունիկ գյուղում այդ բախտով գնաց, պապիկը ոտքից հաշմանդամ է: Նրանց ընտանիքը հնար չունի, գնացել եմ իրենց տուն, գումար եմ տվել, որ գոնե կարողանան տղայի հոգեհանգստի հետ կապված մի հոգս հոգան: Ինչ ասեմ, շատ ցավալի դեպք է»:
Իսկ ջրահեղձության ամենաշատ դեպքերը լինում են մեր սիրելի Սևանա լճում: Օգոստոսի 11-ին Սևանում ջրահեղձ էր եղել Ծովակ գյուղի բնակիչ 27-ամյա Արկադի Վարդանյանը:
Ծովակ համայնքի ղեկավար Գարիկ Հակոբյանն ասել էր, որ Արկադին ալկոհոլի ազդեցության տակ չի եղել, քանի որ խմիչքի հետ սեր չուներ. «Ռուսաստանի Դաշնության Սարատով քաղաք պետք է մեկներ, սակայն օդանավակայանից նրա տոմսերը վերադարձրել էին' պատճառաբանելով, թե թռիչքը երկու օր անց պետք է լինի: Տղան էլ մասնակցել էր եղբոր ծննդյան արարողությանը «Կարճաղբյուրի» մոտ գտնվող լողափում և ջրահեղձ եղել»:
Երեկ էլ՝ օգոստոսի 18-ին, Գեղարքունիքի մարզի Սևանա թերակղզու մերձակայքում ջրահեղձվել էր 65-ամյա մի տղամարդ»:
Առավել մանրամասն՝ «Ժողովորդ» թերթի այսօրվա համարում: