ԱՄՆ-ն С-400-ներն օգտագործել է Թուրքիային F-35-ների ծրագրից հանելու համար. Ֆիդան

ԱՄՆ-ն Ռուսաստանից С-400 զենիթահրթիռային համակարգերի գնումն օգտագործել է որպես պատրվակ Թուրքիային F-35 կործանիչների ստեղծման ծրագրից բացառելու համար։ Այդ պատճառով Անկարան վնասներ է կրել, եւ թուլացել են նրա գործառնական հնարավորությունները։ Այս մասին հայտնել է Թուրքիայի արտգործնախարար Հաքան Ֆիդանը A-haber հեռուստաալիքի եթերում։

«F-35-ների ծրագրից հանելու խնդիրը մեր քաղաքականության եւ մեր ՀՕՊ հնարավորությունների բարելավման արտացոլումն է դարձել։ Մենք չկարողացանք ՆԱՏՕ-ի գծով գործընկերներից ստանալ սպասվող աջակցությունը, եւ մենք համաձայնություն կնքեցինք Ռուսաստանի հետ С-400-ների վերաբերյալ։ Ամերիկացիներն իրենց իրավական դաշտում օգտագործեցին այն որպես պատրվակ [Թուրքիային F-35-ների ծրագրից հանելու համար]»,- ասել է նա։

Ֆիդանը նշել է, որ Թուրքիան «ոչ միայն այդ ինքնաթիռների պատվիրատուն էր, այլեւ կոմպլեկտավորողների արտադրողներից մեկը»։ «Ֆինանսական վնասներից բացի մենք կորցնում ենք նաեւ գործառնական հնարավորություններ։ Այժմ մենք աշխատում ենք, որպեսզի վերացնենք այդ կորուստները։ Մեր երկրի համապատասխան գերատեսչություններն ակտիվ աշխատանք են տանում նյութական վնասի փոխհատուցման ուղղությամբ»,- ասել է նախարարը։

Խոսելով երկրի ՀՕՊ համակարգի ամրապնդման հեռանկարների մասին՝ Ֆիդանը նշել է, որ С-400-ների վերաբերյալ համաձայնագրից հետո զուգահեռ սկսվել է սեփական ՀՕՊ համակարգի ներդրումը, հատկապես փոքր, միջին եւ մեծ հեռահարության, Roketsan ընկերության Hisar համակարգի օգտագործմամբ։ «Կշարունակվի՞ արդյոք գործընկերությունն արեւմտյան երկրների հետ ՀՕՊ համակարգերի վերաբերյալ՝ չգիտեմ։ Նրանք պետք է իրենք մտածեն այդ մասին։ Մեր ազգային քաղաքականությունն այն է, որ մենք պետք է ապահովենք հակաօդային պաշտպանությունն ինչպես ներմուծման, այնպես էլ ներքին արտադրության հաշվին»,- ասել է Ֆիդանը։