Ծաղկունք գյուղում անցկացվեց թափոնների կառավարման իրազեկմանը նվիրված հեծանվարշավ

«Այ Էս Էս Դի» Համայնքների կայուն զարգացման նորարարական լուծումներ» հասարակական կազմակերպությունը «Առավել արդյունավետ ոլորտային ծառայությունների մատուցում ՏԻՄ-երում.թափոնների կառավարումը Հայաստանի համայնքներում փուլ 2` ընդլայնվելով Գագարին համայնք» ծրագրի շրջանակներում Սեւան համայնքի Ծաղկունք բնակավայրում իրականացրեց իրազեկման արշավ` Սեւան հեծանվային ակումբի 17 հեծանվորդի մասնակցությամբ:

Ինչպես «Արմենպրես»-ին տեղեկացրին Սեւանի համայնքապետարանի աշխատակազմից, իրազեկման արշավի ընթացքում պատանի հեծանվորդները, շրջելով Սեւան համայնքի Ծաղկունք բնակավայրի թաղամասերով, միաժամանակ իրազեկում էին բնակիչներին թափոնների տեսակավորման բնապահպանական կարեւորության մասին եւ տեղեկացնում, որ առաջիկայում շուրջ 220 տնտեսությունում տեղադրվելու են թուղթ, պլաստիկ եւ ապակի տեսակավորելու համար նախատեսված աղբամաններ:

Հեծանվորդներն իրենց կանգառներն էին կատարում, բնակիչներին բաժանում տեղեկատվական թռուցիկներ:

«Այս ինքնատիպ իրազեկման արշավը Ծաղկունքի հերթական օրը դարձրեց առավել հետաքրքիր, իսկ նախատեսվող աշխատանքները` տեսանելի և առարկայական:

«Գագարին» նախագծի գործընկերների՝ «Համայնքների կայուն զարգացման նորարար լուծումներ» ՀԿ-ի եւ Հայաստանում Նիդերլանդների թագավորության միջեւ 2022 թվականին կնքվել է «Ընդլայնվելով դեպի Գագարինի հովիտ» նոր ծրագրի համագործակցության համաձայնագիր, որի շրջանակներում, ի թիվս կրթական եւ իրազեկման մի շարք նախաձեռնությունների, Գագարին նախագծի 6 բնակավայրերի՝ Զովաբեր, Դդմաշեն, Ծաղկունք, Գեղամավան, Վարսեր, Գագարին, համայնքային բոլոր կառույցներում, ինչպես նաեւ Ծաղկունք գյուղի տնային բոլոր տնտեսություններում տեղադրվելու են աղբի տեսակավորման արկղեր։ Այս ծրագրով գործնական ընթացք է ստանում Նախագծում ընդգրկված բնակավայրերում աղբի հավաքման եւ վերամշակման մշակույթի ներդրման նախաձեռնությունը, որի նպատակն է՝ զրոյացնել տարածքում կենցաղային աղբի գեներացումն ու աղբավայրերի գոյացումը:

Ծրագիրը նպատակ ունի՝ փորձարկել թափոնների հավաքման նոր մոտեցում, որի հաջողությունն ապացուցվել է մի շարք եվրոպական եւ արեւմտյան երկրներում»,-ներկայացրին Սեւանի համայնքապետարանի աշխատակազմից: