Մանրամասներ Քարակերտում տեղի ունեցած սպանութունից. 3 անձ ձերբակալվել է (ֆոտո)

ՀՀ քննչական կոմիտեի Արմավիրի մարզային քննչական վարչությունում իրականացված մի շարք անհետաձգելի միջոցառումների արդյունքում բացահայտվել է ժամեր առաջ գիշերային ակումբում տեղի ունեցած սպանության դեպքը: Այս մասին հայտնել է ՀՀ քննչական կոմիտեն։

«2023թ. հուլիսի 3-ին՝ ժամը 05:26-ին, ՀՀ ՆԳՆ ոստիկանության Արմավիրի բաժնում հաղորդում է ստացվել այն մասին, որ կտրած-ծակած մարմնական վնասվածքներով Արմավիրի բժշկական կենտրոն բուժօգնության են ընդունվել նույն մարզի Քարակերտ բնակավայրի երեք բնակիչներ, որոնցից մեկը հիվանդանոցում մահացել է:

Նույն օրը՝ ժամը 02:30-ի սահմաններում, հաղորդում է ստացվել նաեւ Արմավիրի մարզի Բաղրամյան համայնքի Քարակերտ բնակավայրում գործող գիշերային ակումբի տնօրենից այն մասին, որ Քարակերտ բնակավայրում իր կողմից շահագործվող գիշերային ակումբում վիճաբանություն է սկսվել հաճախորդների միջեւ, ինչը վեր է ածվել ծեծկռտուքի:

Փաստի առթիվ, ՀՀ քրեական օրենսգրքի 155-րդ հոդվածի 1-ին մասի, 166-րդ հոդվածի 1-ին մասի 1-ին կետի եւ 297-րդ հոդվածի 2-րդ մասի 1-ին կետի եւ 3-րդ մասի հատկանիշներով, նախաձեռնվել է քրեական վարույթ:

Նախաքննության ընթացքում ձեռնարկված քննչական եւ վարութային անհրաժեշտ եւ անհետաձգելի գործողությունների, ինչպես նաեւ ՆԳՆ ոստիկանության համապատասխան ստորաբաժանման ծառայողների հետ համատեղ իրականացված միջոցառումների արդյունքում պարզվել են քննության համար էական նշանակություն ունեցող հանգամանքներ, այդ թվում՝ միջադեպին մասնակից, ինչպես նաեւ հնարավոր հանցագործություն կատարած անձանց շրջանակը, շարժառիթը։

Մասնավորապես, ըստ նախնական տվյալների, հիշյալ օրը ակումբում կենցաղային հարցերի շուրջ վիճաբանություն է առաջացել ակումբի հաճախորդների՝ մի կողմից Քարակերտի 4 եւ Արագածոտնի մարզի Արտենի բնակավայրի 2 բնակիչների միջեւ։ Վիճաբանողները փոխադարձ հարվածներ են հասցրել միմյանց, որի ընթացքում Արտենիի 23-ամյա բնակիչն իր մոտ գտնվող սուր կտրող-ծակող գործիքով հարվածել է իրենց հետ վիճաբանող քարակերտցիներից մեկին, ով մահացել է հիվանդանոցում:

Նույն օրը հաղորդում է ստացվել նաեւ Արտենիի հիշյալ 23-ամյա բնակչից այն մասին, որ իրենց հետ վիճաբանող անձանցից մեկն իր ձեռքին եղած մահակով, իսկ մյուսները ձեռքերով եւ ոտքերով հարվածեր են հասցրել իր մարմնի տարբեր մասերին, որից հետո ինքը ծալովի դանակով հարվածներ է հասցրել իրեն ծեծողներին` նրանց պատճառելով մարմնական վնասվածքներ:

Փաստի առթիվ, վարույթն իրականացնող մարմնի որոշմամբ, նախաձեռնվել է քրեական վարույթ՝ ՀՀ քրեական օրենսգրքի 195-րդ հոդվածի 2-րդ 5-րդ կետով եւ, օբյեկտիվ ու բազմակողմանի քննություն ապահովելու նպատակով, միացվել սպանության, ֆիզիկական ներգործության եւ առողջությանը ծանր վնաս պատճառելու հատկանիշներով նախաձեռնված քրեական վարույթին:

Երեք անձ ձերբակալվել է, որոնցից մեկը՝ 23-ամյա նշված երիտասարդը՝ ՀՀ քրեական օրենսգրքի 155-րդ հոդվածի 1-ին մասով եւ 166-րդ հոդվածի 1-ին մասի 1-ին կետով, մեկը՝ 297-րդ հոդվածի 2-րդ մասի 1-ին կետով, իսկ երրորդը 297-րդ հոդվածի 3-րդ մասով նախատեսված հանցանք կատարելու կասկածանքով:

Նախաքննության ընթացքում կատարվել է դեպքի վայրի զննություն, որի ընթացքում վերցվել են փորձանմուշներ, կատարվել են առգրավումներ, նշանակվել է դատահետքաբանական, ինչպես նաեւ, տուժողի (տուժողների) մարմնական վնասվածքների բնույթը, ծանրության աստիճանը, առաջացման մեխանիզմը եւ մի շարք այլ հանգամանքներ պարզելու նպատակով, դատաբժշկական փորձաքննություններ:

Նախաքննությունը շարունակվում է»,- ասված է հաղորդագրության մեջ: