Հրդեհների հետևանքով Մոնրեալի օդն աշխարհի մեգապոլիսների մեջ ամենաանառողջն է դարձել. IQAir

Անտառային հրդեհների ծուխը Մոնրեալի օդը դարձրել է աշխարհի բոլոր քաղաքներից ամենաանառողջը: Այս մասին հայտնում է IQAir մոնիտորինգային գործակալությունը։

Ըստ փորձագետների՝ կիրակի օրը՝ հունիսի 25-ին, օդի որակի օրական ինդեքսը հասել է 190-ի (որքան շատ, այնքան վատ), հունիսի 26-ին այն իջել է մինչև 158-ի։ Համեմատության համար նշենք, որ հրապարակման պահին Մոնրեալն առաջ է անցել միայն Սան Պաուլոյից, որի ինդեքսը 162 է, իսկ Մոսկվայի համար բնորոշ անբարենպաստ օրերին ինդեքսը մոտավորապես 60 է, որը համարվում է «չափավոր վնասակար»: 190 ինդեքսը համարվում է «անառողջ», իսկ 25-ի առավոտյան Մոնրեալում ժամային ցուցիչները 280-ից բարձր էին:

Կանադայի շրջակա միջավայրի նախարարությունը բնակիչներին կոչ է արել խուսափել բացօթյա գործունեությունից և անհրաժեշտության դեպքում դիմակներ կրել: Փակվել են բացօթյա լողավազաններն ու սպորտային հրապարակները, չեղարկվել են բազմաթիվ բացօթյա միջոցառումներ, այդ թվում՝ համերգներ և սպորտային միջոցառումներ։

Ըստ Քվեբեկի անտառային հրդեհների գործակալության՝ SOPFEU-ի՝ Քվեբեկում 80 ակտիվ անտառային հրդեհներ կան, որոնցից մի քանիսն ուժեղացել են շոգ եղանակի պատճառով։

Կանադայի անտառային հրդեհների դեմ պայքարի միջգերատեսչական կենտրոնը (CIFFC) հայտնում է ավելի քան 450 ակտիվ հրդեհների մասին ամբողջ երկրում, որոնցից մոտ 240-ը համարվում են անվերահսկելի: