Գերմանիան եւ Ֆրանսիան պնդում են, որ հսկայական ծախսեր արվեն՝ ԱՄՆ-ի հետ մրցակցելու համար

Գերմանիան եւ Ֆրանսիան նախազգուշացրել են, որ եվրոպական ձեռնարկությունները գրեթե աննախադեպ մասշտաբի ներդրումների կարիք կունենան՝ ամերիկյան եւ չինական ընկերություններից հետ չմնալու համար, քանի որ երկրները արդիականացնում են իրենց տնտեսությունները, որպեսզի այն ավելի բարենպաստ դարձնեն կլիմայի համար, գրում է Bloomberg-ը։

Գերմանիայի կանցլեր Օլաֆ Շոլցը եւ Ֆրանսիայի նախագահ Էմանուել Մակրոնը հանդիպել են կիրակի Փարիզում, որպեսզի քննարկեն, թե ինչպես պետք է Եվրամիությունը արձագանքի գնաճի նվազեցման ամերիկյան օրենքին, որը նախատեսում է մոտ 500 միլիարդ դոլարի նոր ծախսեր եւ հարկային արտոնություններ մեկ տասնամյակի ընթացքում՝ ի շահ ամերիկյան ընկերությունների:

ԵՄ-ն պնդում է, որ օրենքը, որն ուժի մեջ է մտել այս տարի, չի համապատասխանում միջազգային կանոններին եւ կնպաստի Եվրոպայից ներդրումների արտահոսքին։ ԵՄ առաջնորդները փետրվարին կհանդիպեն՝ քննարկելու իրենց տարբերակները, որոնցից մեկն Առեւտրի համաշխարհային կազմակերպություն բողոք ներկայացնելն է:

«Առաջին բանը, որ պետք է անել՝ համոզվելն է, որ մեզ՝ որպես Եվրամիություն, ավելի վատ չեն վերաբերվում, քան անմիջական հարեւաններին, օրինակ՝ Կանադային եւ Մեքսիկային, դա անընդունելի է»,- ասել է Շոլցը Ելիսեյան պալատում Մակրոնի հետ համատեղ մամուլի ասուլիսում՝ հավելելով, որ ԱՄՆ-ը «մեծ ըմբռնում» է ցուցաբերել այդ հարցում։ «Ներկայումս վստահ եմ, որ առաջին կիսամյակի ընթացքում մենք կհասնենք անհրաժեշտ փոխըմբռնման»։

Սուբսիդիաների մրցավազք

ԱՄՆ օրենքը սուբսիդավորում է ապագայի էներգիան՝ ջրածնից մինչեւ մարտկոցներ, քամի եւ արեւ, եւ նպատակ ունի արտադրությունն ինքնաբավ դարձնել եւ երաշխավորել, որ երկիրը կախված չէ Չինաստանից կամ այլ երկրներից:

Գերմանիան եւ Ֆրանսիան ԱՄՆ-ին կոչ են արել փոխել օրենքը՝ եվրոպական ընկերություններին առաջարկվող վարկերն օգտագործելու ավելի ճկունություն տալու համար։ Սակայն ԵՄ պաշտոնյաները գնալով ավելի թերահավատ են, որ Վաշինգտոնը փոփոխություններ կկատարի եւ սկսել են եվրոպական արդյունաբերությունը պաշտպանելու ուղիներ մշակել:

ԵՄ-ի պատասխանը, ամենայն հավանականությամբ, կներառի անդամ երկրներին սեփական ընկերություններում ներդրումներ անելու ավելի մեծ ազատություն տալը եւ ԵՄ-ի գոյություն ունեցող գումարները կարիքավոր ընկերություններին վերաուղղորդելը:

Եվրոպական խորհրդի նախագահ Շառլ Միշելը մի քանի քայլեր է առաջարկում դաշինքի տնտեսությունն ամրապնդելու համար, ներառյալ պարտատոմսերի նոր ծրագիրը՝ ԵՄ անդամ երկրների ֆինանսական տարբեր դիրքերը հարթելու համար:

Եվրոպական արձագանքը

Կլիմայի մասին ԱՄՆ օրենքը եւ Եվրոպայի զարգացող արձագանքը մտահոգություններ են առաջացրել «ակն ընդ ական» սուբսիդիաների եւ նոր պրոտեկցիոնիզմի վերաբերյալ, որը պառակտում է համաշխարհային տնտեսությունը եւ բարձրացնում գները սպառողների համար: Սակայն Շոլցն ասել է, թե չի կարծում, որ օրենքը կարող է առեւտրային պատերազմ առաջացնել անդրատլանտյան դաշնակիցների միջեւ:

Մրցակցության հարցերով ԵՄ ղեկավար Մարգրետ Վեստագերը նախազգուշացրել է, որ ընկերություններին տրվող չափից շատ ազգային աջակցությունը կարող է վնասել փոքր եւ աղքատ երկրներին, որոնք ունեն ավելի քիչ ֆինանսական հնարավորություններ: Գերմանիան եւ Ֆրանսիան՝ ԵՄ երկու խոշորագույն տնտեսությունները, ամենաշատն են շահել Եվրահանձնաժողովի կողմից գործող կանոնների մեղմացումից, որպեսզի օգնեն ընկերություններին հաղթահարել էներգիայի մեծ ծախսերը:

Վեց երկիր՝ Դանիան, Ֆինլանդիան, Իռլանդիան, Նիդեռլանդները, Լեհաստանը եւ Շվեդիան, արդեն հորդորել են Եվրահանձնաժողովին մեծ զգուշավորություն ցուցաբերել ԵՄ ժամանակավոր ճգնաժամային շրջանակները փոխելու ժամանակ։ Նրանք նախազգուշացրել են ներքին շուկայի մասնատման, վնասակար սուբսիդիաների եւ տարածաշրջանային ավելի թույլ զարգացման ռիսկի մասին: