Ոստիկաններ տաք հետքերով հայտնաբերել են ոստիկանության նախկին պաշտոնյայի տղային ծեծի ենթարկած ու դանակի հարվածներ հասցրած 3 կասկածյալին. shamshyan.com

Դեկտեմբերի 31-ին ոստիկանության Արաբկիրի բաժին բերման է ենթարկվել Երևանի 3 քաղաքացի՝ ծանր մարմնական վնասվածք հասցնելու կասկածանքով, հայտնում է shamshyan.com-ը:

Բերման ենթարկվածներն են 32-ամյա Շահեն Ն-ն, 21-ամյա Արեգ Վ-ն, 21-ամյա Տիգրան Վ-ն։

Վերջիններս կասկածվում են դեկտեմբերի 30-ին Արաբկիր վարչական շրջանի Մամիկոնյանց փողոցում 35-ամյա Էդուարդ Նադարյանի հետ վիճաբանելու, նրան դանակի մի քանի հարված հասցնելու համար։ Վիճաբանության ժամանակ էլ Է. Նադարյանը իր մոտ եղած ատրճանակով մի քանի կրակոց է արձակել։

Ոստիկանությունն ու քննչական բաժինը նշված արարքի համար որոնում են նաև Երևանի բնակիչ՝ 23-ամյա Մարտին Մ-ին և ոմն Արթուրի, ում ինքնությունը պարզվում է։

Գ. Շամշյանի տեղեկություններով՝ հերքվել է նաև այն, որ երբ դեպքի վայրում մի քանի քաղաքացիներ, ովքեր հրաժարվել էին տեսախցիկի առաջ խոսել, հայտնել էին, որ հնարավոր է՝ Է. Նադարյանի նկատմամբ հաշվեհարդար են տեսել իր հոր՝ ոստիկանության նախկին պաշտոնյա, ոստիկանության գնդապետ Վարդան Նադարյանի պատճառով։

Պարզվել է, որ վիճաբանություն-ծեծկռտուքը տեղի է ունեցել ժամը 02։10-ի սահմաններում Մամիկոնյանց փողոցի 34Բ շենքի դիմաց աղմկելու համար, որի ժամանակ Է. Նադարյանը եղել է միայնակ, իսկ մնացածը՝ միասին։

Նշված անձինք ոստիկանության Արաբկիրի բաժնից ներկայացվել են Հայաստանի քննչական կոմիտեի Երևան քաղաքի քննչական վարչության Արաբկիրի քննչական բաժին։

Ոստիկանություն ու քննչական բաժինը պարզում են նաև՝ ում կողմից է դանակի բազմաթիվ հարվածներ ստացել վիրավորը, ինչպես նաև հայտնաբերելու համար հանցագործության գործիք դանակը կամ դանակները։

Ինչպես ավելի վաղ դեպքի վայրից հայտնել էր ֆոտոլրագրողը, դեկտեմբերի 30-ին կրակոցներ էին հնչել Երևանում։ Ժամը 02։15-ի սահմաններում ոստիկանության Արաբկիրի բաժին օպերատիվ տեղեկություններ էին ստացվել, որ Մամիկոնյանց փողոցի 38/1 հասցեում կրակոցներ են հնչել։ Նույն ժամին ահազանգ էր հնչել նաև ՀՀ ոստիկանության Պարեկային ծառայություն, որ նշված վայրում կրակոցներ են հնչել, և կա վիրավոր քաղաքացի։