Էրդողանը դատի է տվել Բունդեսթագի փոխխոսնակին՝ իրեն «կոյուղու փոքրիկ առնետ» անվանելու համար

Թուրքիայի նախագահ Ռեջեփ Թայիփ Էրդողանը դատի է տվել Բունդեսթագի փոխխոսնակ Վոլֆգանգ Կուբիցկիին, ով իր նախընտրական քարոզարշավի ժամանակ Էրդողանին անվանել է «կոյուղու փոքրիկ առնետ» և սուր քննադատության ենթարկել նրա՝ փախստականների հարցով քաղաքականությունը, գրում է Spiegel-ը։

Սեպտեմբերի 29-ի նամակում Քյոլնի փաստաբան Մուստաֆա Կապլանը Էրդողանի անունից հայց է ներկայացրել Կուբիցկիի դեմ՝ վիրավորանքի և զրպարտության համար։ Յոթ էջանոց այս փաստաթուղթը ներկայացվել է Հիլդեսհայմի դատախազություն:

Փաստաթղթում նշվում է, որ Թուրքիայի նախագահի համար դժվար է ընդունել Կուբիցկիի հայտարարությունը «կրոնական նկատառումներով», «քանի որ իսլամը բացառում է նման վիրավորանքները»։

Ի պատասխան՝ Բունդեսթագի փոխխոսնակը փորձել է արդարացնել իրեն: Նա նշել է, որ «կոյուղու փոքրիկ առնետը» «փոքր, սրամիտ, բայց խելացի ու խորամանկ արարած է», ինչպես նաև հիշել է «Ռատատույ» անիմացիոն ֆիլմը։

Փաստաբան Կապլանը նման ակնարկները գնահատում է որպես պաշտպանություն։ Կապլանը կարծում է, որ «Ռատատույ»-ը «ոչ մի առնչություն չունի Թուրքիայի՝ փախստականների հարցով քաղաքականության հետ»:

Այս դեպքն արդեն դիվանագիտական ​​ճգնաժամ է առաջացրել։ Կուբիցկիի հայտարարությունների պատճառով Թուրքիան իր մոտ է կանչել Գերմանիայի դեսպանին։