Էր Ռիադի՝ Կրետե կղզում գտնվող ռազմաբազա F-15 կործանիչներ ուղարկելու որոշումը նյարդայնացնում է Անկարային

Էր Ռիադի՝ հունական Կրետե կղզում գտնվող ռազմաբազա F-15 կործանիչներ ուղարկելու որոշման մասին հունական ԶԼՄ-ների հրապարակումները մտահոգություն են առաջացրել Անկարայում:

The Greek City Times-ը հայտնել է մոտ ապագայում Հունաստանի եւ Սաուդյան Արաբիայի համատեղ զորավարժությունների մասին: Այդ համատեքստում թուրքական Haberler թերթը գրել է «Թուրքիայի համար սպառնալիքի» մասին եւ նշել, որ սաուդական F-15 ինքնաթիռները կկառավարեն հույն օդաչուները:

Թուրքական Zaman թերթը հայտնել է միայն մանեւրների եւ Հունաստան սաուդական կործանիչների ուղարկման ծրագրի մասին Էր Ռիադի եւ Աթենքի միջեւ ռազմական համագործակցության շրջանակում:

Zaman-ը նշում է, որ անցած ամառ Հունաստանն ու Կիպրոսը մի քանի ռազմական մանեւրներ են անցկացրել Արեւելյան Միջերկրական ծովում «Թուրքիայի դեմ իր դաշնակիցների հետ համագործակցությամբ»:

Աթենքը նաեւ 20-ամյա ռազմական համագործակցության շուրջ համաձայնագիր է կնքել Թել Ավիվի հետ 1,68 մլրդ դոլարի չափով: Zaman-ը գրում է, որ հունական ԶԼՄ-ների հրապարակումներում նշվում է, որ Սաուդյան Արաբիան մի քանի F-15 կործանիչներ կուղարկի Կրետեի ռազմաբազա թագաժառանգ արքայազն Մոհամմեդ բին Սալմանի հրամանով: Դա կապված է տարածաշրջանում Թուրքիայի տեղաշարժի առնչությամբ Հունաստանի մտավախությունների, հատկապես Էգեյան ծովում եւ Արեւելյան Միջերկրական ծովում երկու երկրների միջեւ լարվածության աճի հետ:

Սաուդյան Արաբիան աշխարհում F-15 ինքնաթիռների մեծությամբ երրորդ պարկն ունի ԱՄՆ-ից եւ Ճապոնիայից հետո: