Հադրութցի Արամը 3 ամսից ավելի է փնտրում է 18-ամյա միակ զավակին. Նրա անունը ոչ մի ցուցակում չկա

Հադրութցի Արամ Ավանեսյանը 3 ամսից ավելի է փնտրում է միակ զավակին` 18-ամյա Վահագն Ավանեսյանին, ով 2 ամսվա զինծառայող էր, երբ սկսվեց պատերազմը:

NEWS.am-ի հետ զրույցում Արամը պատմել է, որ որդու անունը ոչ գերիների, ոչ մահացածների ցուցակում չկա:

«Ես ԱԻՆ աշխատակիցների, Կարմիր խաչի ու ռուս խաղաղապահների հետ անձամբ եմ մասնակցում որոնողական աշխատանքներին: Ոդիս Ջաբրայիլում էր ծառայում, նահանջի հրամանով հետ են եկել Հադրութի կողքի գյուղերից մեկի վերեւը ու դրանից հետո կապը կտրվել է: Հոկտեմբերի 14-ից հետո էլ զանգ չենք ստացել: Իրենք խմբով են եղել, իր հետ ծառայողներից մեկը պատմել է, որ իրենք սարի մոտով անցել են, տղայիս խփել են, բայց մինչեւ հիմա չենք գտնում»,-ասել է նա:

Արամ Ավանեսյանը պատմեց, որ թշնամին թույլ չի տալիս նորմալ որոնողական աշխատանքներ իրականացնել, իսկ Արցախի ԱԻՆ-ի աշխատակիցներից շատ գոհ է:

Արամի կինն ու դուստրը Հայաստանում են մնացել, ինքն էլ ժամանակավորապես Ստեփանակերտում է բնակվում:

«Ոչ տուն ունեմ, ոչ աշխատանք ունեմ, ամեն ինչ կորցրել եմ: Հագս ինչ կա, հագել դուրս եմ եկել: Փոխհատուցում չեմ ստացել: Արցախում էլ տուն չկա մնալու, Շուշիից, Հադրութից բոլորը եկել են Ստեփանակերտ են մնացել»,- ասել է նա: