Կենդանիների համար պահանջվող տուրքի համար մորատորիում կա. Հակոբ Կարապետյան (տեսանյութ)
Այսօր Երևանի քաղաքապետարանի մոտ էին հավաքվել մի խումբ կենդանասերներ ու կենդանապաշտպաններ՝ պահանջելով չեղարկել այն օրենքը, ըստ որի՝ պահանջվում է տուրքի վճար սահմանել տնային կենդանիներ պահելու թույլտվության համար:
Վերջին օրերին Աջափնյակ համայնքի որոշ բնակիչներ, ովքեր շներ են պահում, ծանուցում են ստացել այն մասին, որ պետք է վճարել կենդանի պահելու համար սահմանված տուրքը՝ 5000 դրամը 5 օրվա ընթացքում, հակառակ պարագայում կտուգանվեն 5000-10.000 դրամով: Երևանի քաղաքապետարանից հավաքվածներին պարզաբանումներ են տվել, ինչի արդյունքում ակցիան կարճ է տևել:
Նաև ասվել է, որ ծանուցում ստացել են միայն նրանք, ում կենդանու վատ վարքագծի մասին տեղեկություն է եղել ոստիկանությունում կամ հարևաններն են բողոք ներկայացրել:
«Տուրքի գոյությունը գնահատվում է որպես անարդյունավետ և վերանայման ենթակա է: Եվ էս պահին, փաստացի, կարող եք համարել, որ մորատորիում կա տուրքի վրա, ծանուցումներ չեն ուղարկվում և չի հավաքագրվում»,- հավաքվածներին ասել է Երևանի քաղաքապետի մամուլի խոսնակ Հակոբ Կարապետյանը:
Կենդանասերների և կենդանապաշտպանների այն պահանջին, որ օրենքը չեղարկվի այնքան ժամանակ, քանի դեռ նոր օրենք, մասնագետների մասնակցությամբ մշակված, չի ընդունվել, Երևանի քաղաքապետարանից պատասխանել են, որ օրենք ընդունողը խորհրդարանն է, ոչ թե իրենք:
Մանրամասները՝ տեսանյութում: